Un manual para ser un bo líder, traballar en equipo e crear un ambiente laboral exitoso é o que publica Julio Liarte co título de 'Trae, que lo hago yo, idiota'. O autor é deseñador e director creativo, especialista en identidade e comunicación de marcas. O libro é resultado da súa traxectoria: "custoume bastante aprender sobre estas cousas. De moi novo tocoume porme ao fronte dun equipo e responsabilizarme del, un reto para o que non estaba preparado naquel momento. Tiven que porme as pilas, aprendendo sobre a marcha, levando erros e acertos ao meu día a día". Máis de quince anos despois dirixindo equipos "aprendín unha serie de cousas que sei que funcionan e sigo aplicando", explica. E explícase neste manual "dicindo as cousas sen pelos na lingua, con humor, con certa irreverencia... porque creo que hai cousas que así se asimilan mellor" describe no podcast 'Cara a cara'. Hai dous termos nos que incide desde o inicio: xefe e líder. Sobre o primeiro estima que "non é algo tan complicado. Simplemente optas a un posto, promociónante ou te asignan. Tes unha etiqueta, unha oficina... e xa es o xefe". Pola contra, dun líder considera que "implica outras cousas, hai que curralo máis, é máis estar día a día para inspirar a túa xente e é o que diferenza de verdade a un líder". Pondera ese liderado engadindo que "é unha actitude e diría que paradoxalmente, fronte ao que se pode crer, unha actitude de servir para que o teu equipo se desenvolva e avance. En definitiva, para que todo funcione mellor". Debulla o manual en doce capítulos nos que desenvolve esas habilidades e aptitudes dun bo líder. Unha figura que para Julio Liarte ten un nome como exemplo, o de Nelson Mandela: "pola súa humildade, a capacidade de deixarse de lado, pensar a longo prazo, no desenvolvemento da súa xente, superar todo o que lle sucedeu, o optimismo que tiña, era admirable". Fala de escoitar e conectar co equipo, de inspirar e motivar de verdade, de delegar, de xestionar conflitos, de adaptación aos cambios e de evitar queimarse (ou definido co anglicismo burnout). Esta última máxima é un dos males cada vez máis frecuentes no ámbito laboral. "Precísamente estes días lin unha enquisa dun medio especializado en empresas que dicía que sete de cada dez persoas se sentiron así nalgún momento. Esa fatiga física e emocional leva á tensión ao final. É un problema porque se non estás equilibrado dificilmente vas ter enerxía para tomar boas decisións e dar o mellor de ti mesmo. Isto vale para calquera persoa. Deberíase prestar moita atención a todo isto", argumenta. É un libro enfocado no ámbito laboral, pero pode extrapolarse a calquera ámbito vital no que hai que tomar decisións, porque "isto vai de persoas e crear relacións entre persoas".