తెలంగాణలో కొత్త రహదారుల నిర్మాణం జరగనుంది. అభివృద్ధికి సంబంధించిన ఎంపిక ప్రక్రియ కొలిక్కి వచ్చింది. పరిధిలోని మొత్తం 12,000 కిలోమీటర్ల రోడ్లను హామ్ మోడల్‌లో అభివృద్ధి చేయాలని ప్రభుత్వం లక్ష్యంగా పెట్టుకుంది. దీనిలో భాగంగా, తొలివిడతలో 5,190 కిలోమీటర్ల మేర రోడ్లను ఎంపిక చేసింది. ఈ ప్రతిపాదనకు క్యాబినెట్ ఆమోదం తప్పనిసరి కావడంతో.. జూన్ 5న జరగనున్న మంత్రిమండలి సమావేశంలో దీనిపై చర్చించి ఆమోదించే అవకాశం ఉంది.ఈ నెల 5న జరగనున్న మంత్రిమండలి సమావేశం నేపథ్యంలో.. మంగళవారం (జూన్ 3) రాష్ట్ర రోడ్లు, భవనాల శాఖ మంత్రి కోమటిరెడ్డి వెంకట్‌రెడ్డి అంతర్గత సమీక్ష నిర్వహించారు. ఈ సమావేశంలో ఆర్‌అండ్‌బీ ప్రత్యేక ప్రధాన కార్యదర్శి వికాస్‌రాజ్, కార్యదర్శి హరిచందన, వివిధ విభాగాల ఇంజినీర్లు పాల్గొన్నారు. జిల్లాల వారీగా చేపట్టాల్సిన హామ్ రోడ్లపై విస్తృతంగా చర్చించారు. అధికారులు మంత్రికి వివరించిన వివరాల ప్రకారం.. ఎంపిక చేసిన రోడ్లకు సంబంధించిన ట్రాఫిక్ సర్వే ఇటీవలే పూర్తైంది. అందుకు సంబంధించిన పూర్తి నివేదిక సిద్ధంగా ఉంది. ఈ నివేదికను క్యాబినెట్ ముందు ఉంచి ఆమోదం పొందేందుకు అన్ని ఏర్పాట్లు చేసినట్లు సమాచారం. హామ్ మోడల్ అనేది ప్రభుత్వ, ప్రైవేట్ భాగస్వామ్యంతో రోడ్లను అభివృద్ధి చేసే పద్ధతి. ఇందులో నిర్మాణ వ్యయంలో కొంత భాగాన్ని ప్రభుత్వం భరిస్తుంది, మిగిలిన మొత్తాన్ని కాంట్రాక్టర్ పెట్టుబడిగా పెడతాడు. రోడ్డు నిర్మాణం పూర్తయ్యాక, నిర్ణీత కాలానికి కాంట్రాక్టర్‌కు ప్రభుత్వం వార్షిక చెల్లింపులు (యాన్యుటీ) చేస్తుంది. ఈ మోడల్ ద్వారా రోడ్ల నిర్మాణం వేగవంతం కావడంతో పాటు నాణ్యత కూడా పెరుగుతుందని భావిస్తున్నారు. ప్రాజెక్టు రాష్ట్రంలో రోడ్డు మౌలిక సదుపాయాలను గణనీయంగా మెరుగుపరుస్తుందని, ప్రజలకు మెరుగైన ప్రయాణ అనుభవాన్ని అందిస్తుందని ఆశిస్తున్నారు. కాగా హ్యామ్ (హైబ్రిడ్ యాన్యుటీ మోడల్) విధానంలో మండల కేంద్రాల నుండి జిల్లా కేంద్రాలకు రెండు వరుసల (డబుల్ వే) రోడ్లు నిర్మిస్తారు. జిల్లా కేంద్రాల నుండి రాష్ట్ర రాజధానికి నాలుగు వరుసల (ఫోర్‌వేస్) మార్గాలుగా అభివృద్ధి చేస్తారు. వీటితో పాటు, రాష్ట్రంలోని స్టేట్ హైవేలు, మేజర్ డిస్ట్రిక్ట్ రోడ్లు, నేషనల్ హైవేలను కలుపుతూ ఉండే రోడ్లను కూడా ఈ హామ్ విధానంలోనే అభివృద్ధి చేయనున్నారు. ఈ ప్రణాళిక రాష్ట్రంలో రహదారి అనుసంధానాన్ని గణనీయంగా మెరుగుపరుస్తుంది.