ఈ మధ్య ఓటీటీ కంటెంట్‌లో ఎక్కువగా కనిపిస్తున్నారు. ఓటీటీ ఆడియెన్స్‌కు ప్రియమణి చాలా దగ్గరైంది. ఫ్యామిలీ మెన్ సిరీస్‌లతో ప్రియమణికి నేషనల్ వైడ్‌గా మరింత క్రేజ్ పెరిగింది. తెలుగులో ఆమె చేసిన భామా కలాపం కూడా హిట్ అయింది. ఇక ఇప్పుడు ‘గుడ్ వైఫ్’ అంటూ ఆడియెన్స్ ముందుకు వచ్చారు. ఈ సిరీస్ ఎలా ఉందో ఓ సారి చూద్దాం.కథఅడిషనల్ అడ్వకేట్ జనరల్ గుణశీలన్ (సంపత్ రాజ్) ఓ సెక్స్ స్కాండల్, డ్రగ్స్ మాఫియా కేసులో ఇరుక్కుంటాడు. దీంతో అతను తన పదవికి రాజీనామా చేస్తాడు. ఆ తరువాత అతడ్ని పోలీసులు అరెస్ట్ చేస్తారు. గుణశీలన్ భార్య తరుణిక (ప్రియమణి) దాదాపు పదిహేనేళ్ల తరువాత మళ్లీ లాయర్ ప్రాక్టీస్ మొదలు పెడుతుంది. ఈ క్రమంలో తన మాజీ ప్రేమికుడు/స్నేహితుడు హరి దీపక్ (ఆరి అర్జునన్) ఇచ్చిన ఆఫర్‌ను ఓకే చేసి అతడి కంపెనీలో జాయిన్ అవుతుంది. ఏఎల్‌హెచ్ అనే ఫర్మ్‌లో తరుణిక జాయిన్ అవుతుంది. పెద్ద పెద్ద కేసుల్ని డీల్ చేసే ఆ సంస్థలో తరుణిక తన ఉద్యోగాన్ని పదిలం చేసుకుంటుందా? జైలుకు వెళ్లిన భర్త కోసం భార్య చేసే ప్రయత్నాలు ఏంటి? అసలు భర్తను విడిపించుకునేందుకే మళ్లీ లా ప్రాక్టీస్ ప్రారంభించిందా? హరి దీపక్, తరుణికల మధ్య మళ్లీ పాత ప్రేమ చిగురిస్తుందా? గుణశీలన్ బయటకు వస్తాడా? అన్నది కథ.ప్రియమణి నటించిన గుడ్ వైఫ్ సిరీస్‌ అమెరికన్ సిరీస్‌కు అడాప్షన్. అక్కడి పరిస్థితులు, అక్కడి మోడ్రన్ లైఫ్‌కు తగ్గట్టుగా ఉంటుంది. మన ఇండియాకు దీన్ని తీసుకు వస్తున్నప్పుడు ఇక్కడి ఎమోషన్స్, ఇక్కడి పద్దతులకు తగ్గట్టుగా ఉండాలి. ఇక్కడి ఆడియెన్స్ ఎమోషన్స్‌కు కనెక్ట్ అయ్యేలా సిరీస్‌ను మలచాల్సి ఉంటుంది. కానీ ఈ ప్రయత్నం మాత్రం ఎక్కడా కూడా జరిగినట్టు అనిపించదు. ఏ ఒక్క పాత్రకి సరైన రూపం ఉండదు. ఏ ఒక్క సీన్‌కు కూడా దాని బ్యాక్ స్టోరీ, బ్యాక్ డ్రాప్ ఉండదు.అసలు ఇది కోర్ట్ డ్రామా అని తెలిసి.. ఇక ఢీ అంటే ఢీ అనే వాదోపవాదాలు ఉంటాయి.. ఎంగేజింగ్‌గా ఉంటుందని అంతా అనుకుంటారు. కానీ అలా అనుకుంటే మాత్రం తప్పులో కాలేసినట్టే. ఇందులో ఆరు ఎపిసోడ్స్‌ ఉంటే.. అందులో ఏ ఒక్క చోట కూడా ఇదిరా.. కోర్టులో వాదనలు అంటే.. అని అనిపించేలా ఒక్క సీన్ కూడా ఉండదు. ఇందులో కోర్టులో ఆర్గ్యుమెంట్స్ ఉండవు.. ఉన్న రెండు, మూడు అంత ఎంగేజింగ్‌గా అనిపించవు.జైలుకు వెళ్లిన భర్త గురించి భార్య పట్టించుకుంటోందా? భర్తను నమ్ముతుందా? నమ్మడం లేదా? భర్తను వదిలేసిందా? అన్న క్లారిటీ చూసే ఆడియెన్స్‌కి కలగదు. భార్యభర్తల మధ్య అన్యోన్యత ఉందా? లేదా? మాజీ ప్రియుడ్ని తల్చుకుంటూ ఉంటోందా? పిల్లల కోసమే భర్తతో ఉంటోందా? అనే అనుమానాల్ని కలిగించేలా సాగుతుంది. ఏ ఒక్క పాత్రకి కూడా సరైన జస్టిస్ ఇవ్వలేదనిపిస్తుంది. గుణశీలన్ మంచివాడా? చెడ్డవాడా? అన్నది కూడా సరిగ్గా ఎస్టాబ్లిష్ చేయలేదు.గుడ్ వైఫ్ అనే టైటిల్ ఎందుకు పెట్టారో సరిగ్గా అర్థం కాదు.. మామూలుగా ఈ టైటిల్ చూస్తే.. ఆ పోస్టర్లు, ప్రమోషనల్ కంటెంట్ చూస్తే.. భర్త జైలుకు వెళ్తే.. కోర్టులో వాదించి.. కేసు కోసం ముప్పు తిప్పలు పడి.. భర్తను బయటకు తీసుకు వచ్చే భార్య కథ అని అనుకుంటారు.. అందుకే గుడ్ వైఫ్ అనే టైటిల్ పెట్టి ఉంటారని అంతా అనుకోవచ్చు. కానీ ఇదేమీ ఆ సిరీస్‌లో జరగదు. భర్త వేరే వ్యక్తితో ఉన్న వీడియోలు, శృంగార వీడియోలు బయటకు వచ్చినా.. విడాకులు ఇవ్వకుండా.. మాజీ ప్రియుడితో కలిసే అవకాశం వచ్చినా దూరంగా ఉంటుంది.. అందుకే గుడ్ వైఫ్ అని టైటిల్ పెట్టారేమోనని చూసే ఆడియెన్స్ సర్దుకోవాలేమో.ఈ ఫస్ట్ సీజనే సగం మందికి ఎక్కడం కష్టం అంటే.. ఇంకా సెకండ్ సీజన్ అని హింట్ ఇచ్చారు. ఇక అందులో ఏం చూపిస్తారో మరి. ఏమాత్రం ఎమోషనల్ కనెక్టివిటీ లేకుండా.. కథకు సంబంధం లేకుండా.. మళ్లీ మధ్యలో ఫర్టిలిటీ కేసులు, డ్రగ్స్ కేసులు అంటూ ఎటెటో తిప్పుతూ ఉంటారు. ఏ ఒక్క సీన్ ఎంగేజింగ్‌గా లేకపోవడం.. ఆరు ఎపిసోడ్స్.. నిడివి ఎక్కువగా ఉండటం.. ఇవన్నీ ఈ సిరీస్‌కు ప్రధాన లోపాలు. గుడ్ వైఫ్‌ సిరీస్‌కు విజువల్స్ ఓకే అనిపిస్తాయి. ఆర్ఆర్ సిరీస్ మూడ్‌కు తగ్గట్టుగా ఉంటుంది. లెంగ్తీగా, సాగదీసినట్టుగా కాకుండా ఎడిటర్ కాస్త ఫాస్ట్ ఫేస్డ్‌గా కట్ చేస్తే బాగుండేదేమో.నటీనటులుగా ప్రియమణి తన నటన, లుక్స్, గ్లామర్‌తో మెప్పిస్తారు. సంపత్ రాజ్‌కు స్పేస్ తక్కువగా అనిపిస్తుంది. కానీ ఉన్నంతలో ఓకే అనిపిస్తారు. ఆరి అర్జునన్ పాత్ర సెకండాఫ్‌లో మరింత ఎక్కువగా ఉండేలా కనిపిస్తుంది. ఈ ఫస్ట్ హాఫ్ వరకు ఆరి తన పాత్రకు న్యాయం చేశాడనిపిస్తుంది. ఉమర్, స్నేహ, అర్చన, పిల్లల పాత్రలు ఇలా అన్నీ కూడా ఓకే అనిపిస్తాయి.గుడ్ వైఫ్ సిరీస్.. ఏదో ఆశించి చూస్తే.. ఇంకేదో ఉన్నట్టుగా అవుతుంది.