Dobre incidencia relacionada co alcol nas estradas de Sanxenxo. A Policía Local interceptou dous condutores que circulaban baixo os efectos do alcol durante a noite deste venres a sábado. No primeiro dos casos, o implicado foi o piloto dunha motocicleta que protagonizou un accidente na Rúa Cesteiros, na que se estaban a acometer traballos de pintado. Ao ir socorrelo, os axentes decatáronse do seu estado de embriaguez, someténdolle ao pertinente control e rexistrando un resultado que practicamente quintuplicaba a taxa máxima de alcol permitida (1,14 mg/l). Ademais o vehículo, que quedou inmobilizado no depósito municipal, carecía de seguro obrigatorio e non contaba coa ITV en regra, polo que se instruíron as pertinentes dilixencias xudiciais. Doutra banda a Policía Local interceptou un condutor que tentou fuxir dun control facendo caso omiso ás indicacións dos axentes. Neste caso o home arroxou unha taxa de alcol en sangue de 0,69 mg/l. Por ese motivo foi denunciado por vía penal por condución temeraria.