A Praza de España de Pontevedra será este xoves 19 de xuño o escenario dunha nova protesta en solidariedade co pobo palestino. O sindicato CGT e a organización Pontevedra Con Palestina chaman á cidadanía a concentrarse ás 19:00 horas, diante da oliveira por Palestina situada nos xardíns da Alameda, para denunciar o que consideran un xenocidio e sinalar aos seus "cómplices". Os convocantes esixen ao Goberno español a ruptura de todas as relacións diplomáticas con Israel e demandan "por coherencia ética e humanismo" a supresión de calquera tipo de vínculo, sexa diplomático, comercial, cultural ou deportivo, co Estado hebreo. "É especialmente urxente o embargo total da compra e venda de armas co goberno e industrias israelís", sinalan as organizacións, que tamén reclaman sancións para empresas e institucións que manteñan relacións con Israel. O acto servirá ademais para amosar o apoio á Marcha Global a Gaza, unha iniciativa cidadá internacional que pretendía crear un corredor humanitario dende a cidade de al-Arish, no Sinaí exipcio, ata Rafah. Segundo denuncian os convocantes, os participantes nesta marcha pacífica sufriron detencións, represión e malos tratos por parte das autoridades exipcias. "Axentes de paisano, a miúdo sen identificarse, sacaron pola forza a participantes de habitacións de hotel, cafés, tendas e rúas sen motivo nin explicación", afirman, destacando o caso do cidadán hispano-palestino Saif Abukeshek, que segundo indican "foi vendado, esposado, interrogado e brutalmente golpeado antes de ser liberado". Non é a primeira acción que estas organizacións celebran en Pontevedra. En anteriores protestas sinalaron a entidades bancarias con oficinas na cidade como "cómplices" do conflito, acusando ao BBVA e ao Banco Santander de investir e conceder préstamos a empresas armamentísticas e de beneficiarse dos asentamentos en territorios ocupados ilegalmente, segundo consta no listado do Consello de Dereitos Humanos de Nacións Unidas.