Renovación importante no Arosa, que aos poucos vai sumando efectivos ao proxecto que dirixirá desde o banco Gonza Fernández. O club arlequinado confirmou este xoves a continuidade de Javi Rey. É un dos futbolistas que máis minutos sumou sobre o verde na tempada recentemente finalizada. O centrocampista pontevedrés, con ampla experiencia en categorías superiores en equipos como Lugo, Guijuelo, Racing de Ferrol ou Pontevedra, participou en concreto en 30 encontros de liga, 25 deles como titular. Rey afrontará desta forma a súa segunda tempada na Lomba. "Desde que cheguei sempre me senti na casa e creo que formamos unha gran familia. É un gusto seguir outro ano máis e estou moi agradecido ao club", afirmou o futbolista tras a súa renovación en declaracións difundidas polo Arosa. Trátase da segunda renovación no plantel arlequinado tras a de Martín Diz. A esta lista súmanse ademais as fichaxes do central Edgar e o gardameta Chema, ascendendo a catro o número de futbolistas confirmados polo Arosa.