ന്യൂഡൽഹി | ദക്ഷിണേഷ്യൻ പ്രാദേശിക സഹകരണ സംഘടനയായ സാർക്കിന് (SAARC) പകരമായി പുതിയൊരു പ്രാദേശിക കൂട്ടായ്മ രൂപീകരിക്കാൻ പാകിസ്ഥാനും ചൈനയും തമ്മിൽ ഉന്നതതല ചർച്ചകൾ നടത്തുന്നതായി റിപ്പോർട്ടുകൾ. പാകിസ്ഥാനിലെ ‘ദി എക്സ്പ്രസ് ട്രിബ്യൂൺ’ ആണ് ഇക്കാര്യം റിപ്പോർട്ട് ചെയ്യുന്നത്. ഇന്ത്യ ഒരു പ്രധാന അംഗമായിരുന്ന സാർക്ക് നിലവിൽ നിഷ്ക്രിയമായ സാഹചര്യത്തിലാണ് പുതിയ നീക്കം.ജൂൺ 19-ന് ചൈനയിലെ കുൻമിംഗിൽ നടന്ന പുതിയ പ്രാദേശിക കൂട്ടായ്മ രൂപീകരിക്കുന്നതിനുള്ള യോഗത്തിൽ ബംഗ്ലാദേശും പങ്കാളിയായിരുന്നുവെന്ന് റിപ്പോർട്ട് പറയുന്നു. സാർക്കിലെ മറ്റ് ദക്ഷിണേഷ്യൻ രാജ്യങ്ങളെയും പുതിയ കൂട്ടായ്മയിൽ ചേരാൻ ക്ഷണിക്കുക എന്നതായിരുന്നു കുൻമിംഗ് യോഗത്തിന്റെ പ്രധാന ലക്ഷ്യമെന്നാണ് വിവരം. ഈ യോഗത്തിന് മുന്നോടിയായി മെയ് മാസത്തിൽ ചൈന-പാകിസ്ഥാൻ-അഫ്ഗാനിസ്ഥാൻ ത്രിരാഷ്ട്ര ചർച്ചയും നടന്നിരുന്നു. ചൈന-പാകിസ്ഥാൻ സാമ്പത്തിക ഇടനാഴി വികസിപ്പിക്കുന്നതിനും താലിബാൻ ഭരണത്തിലുള്ള അഫ്ഗാനിസ്ഥാനിലെ പ്രാദേശിക സഹകരണം വർദ്ധിപ്പിക്കുന്നതിനുമാണ് ഈ യോഗം ശ്രദ്ധ കേന്ദ്രീകരിച്ചത്.1985 ഡിസംബർ 8-ന് ധാക്കയിൽ ചാർട്ടർ അംഗീകരിച്ചുകൊണ്ടാണ് സാർക്ക് രൂപീകരിക്കപ്പെട്ടത്. ഏഴ് സ്ഥാപക അംഗങ്ങളുണ്ടായിരുന്ന സാർക്കിൽ 2007-ൽ അഫ്ഗാനിസ്ഥാൻ അംഗമായി. 2016 മുതലാണ് സാർക്ക് നിഷ്ക്രിയമായത്. 2014-ലെ കാഠ്മണ്ഡു ഉച്ചകോടിക്ക് ശേഷം സാർക്ക് നേതാക്കൾ കൂടിക്കാഴ്ച നടത്തിയിട്ടില്ലെങ്കിലും, 2020-ൽ പ്രധാനമന്ത്രി നരേന്ദ്ര മോദി കോവിഡ്-19 എമർജൻസി ഫണ്ട് നിർദ്ദേശിച്ചുകൊണ്ട് ആദ്യമായി ഒരു സാർക്ക് വീഡിയോ കോൺഫറൻസ് വിളിച്ചുചേർക്കുകയും ഇന്ത്യയുടെ സംഭാവനയായി 10 മില്യൺ ഡോളർ വാഗ്ദാനം ചെയ്യുകയും ചെയ്തിരുന്നു.2016 നവംബറിൽ ഇസ്ലാമാബാദിൽ നടക്കാനിരുന്ന 19-ാമത് സാർക്ക് ഉച്ചകോടി, പാകിസ്ഥാൻ സ്പോൺസർ ചെയ്ത ഉറി ഭീകരാക്രമണത്തിൽ 17 ഇന്ത്യൻ സൈനികർ കൊല്ലപ്പെട്ടതിനെത്തുടർന്ന് ഇന്ത്യ ബഹിഷ്കരിക്കാൻ തീരുമാനിച്ചു. തുടർന്ന്, തീവ്രവാദത്തെയും പ്രാദേശിക ഇടപെടലുകളെയും കുറിച്ചുള്ള ആശങ്കകൾ ഉന്നയിച്ച് അഫ്ഗാനിസ്ഥാൻ, ബംഗ്ലാദേശ്, ഭൂട്ടാൻ എന്നീ രാജ്യങ്ങളും പിൻവാങ്ങിയതോടെ ഉച്ചകോടി റദ്ദാക്കപ്പെട്ടു. അതിനുശേഷം അത് പുനഃക്രമീകരിച്ചിട്ടില്ല.പ്രാദേശിക ഏകീകരണത്തിനും ബന്ധിപ്പിക്കലിനും ഒരു പുതിയ സംഘടന അനിവാര്യമാണെന്ന് പാകിസ്ഥാനും ചൈനയും ഒരുപോലെ വിശ്വസിക്കുന്നതായി ‘ദി എക്സ്പ്രസ് ട്രിബ്യൂൺ’ റിപ്പോർട്ട് പറയുന്നു. ശ്രീലങ്ക, മാലിദ്വീപ്, അഫ്ഗാനിസ്ഥാൻ എന്നിവയുൾപ്പെടെയുള്ള സാർക്ക് അംഗങ്ങളും പുതിയ കൂട്ടായ്മയുടെ ഭാഗമാകുമെന്ന് പ്രതീക്ഷിക്കുന്നു.അതേസമയം, ബംഗ്ലാദേശ് പുതിയ സഖ്യത്തെക്കുറിച്ചുള്ള വാർത്തകൾ നിഷേധിച്ചു. ചൈനയിലെ കുൻമിംഗിൽ നടന്ന മൂന്ന് രാജ്യങ്ങളുടെ യോഗം രാഷ്ട്രീയ യോഗമായിരുന്നില്ലെന്ന് ബംഗ്ലാദേശ് വിദേശകാര്യ ഉപദേഷ്ടാവ് എം തൗഹിദ് ഹുസൈൻ പറഞ്ഞു. യോഗം ഉദ്യോഗസ്ഥ തലത്തിലായിരുന്നെന്നും ഒരു സഖ്യം രൂപീകരിക്കുന്നതിനുള്ള ഒരു ഘടകവും അതിൽ ഉണ്ടായിരുന്നില്ലെന്നും അദ്ദേഹം വ്യക്തമാക്കി.പുതിയ ചേരിയിൽ ചേരാൻ ഇന്ത്യയെ ക്ഷണിക്കുമെന്നും എന്നാൽ ഇന്ത്യയുടെ താൽപ്പര്യങ്ങൾ വ്യത്യസ്തമായതിനാൽ അനുകൂലമായി പ്രതികരിക്കാൻ സാധ്യതയില്ലെന്നും നയതന്ത്ര വൃത്തങ്ങളെ ഉദ്ധരിച്ച് റിപ്പോർട്ട് പറയുന്നു. സാർക്കിൽ ഇന്ത്യക്ക് ഉണ്ടായിരുന്ന മേധാവിത്വം ഇല്ലാതാക്കുക എന്നതാണ് പുതിയ കൂട്ടായ്മയിലൂടെ പാക്കിസ്ഥാനും ചൈനയും ലക്ഷ്യമിടുന്നത് എന്നും റിപ്പോർട്ടുകളുണ്ട്.