లో ముంబై ఇండియన్స్ ఫ్రాంఛైజీ అయిన ఎంఐ న్యూయార్క్ వరుస ఓటములతో సతమతమవుతోంది. పూరన్ సారథ్య బాధ్యతలు తీసుకున్న ఈ ఏడాది ఆ జట్టు దారుణంగా విఫలమవుతోంది. భారీ స్కోర్ చేసినప్పటికీ వికెట్లు తీయడంలో విఫలమై పరాజయం పాలవుతోంది. ఈ రోజు సియాటిల్ ఓర్కాస్‌తో జరిగిన మ్యాచ్‌లోనూ పూరన్ సెంచరీతో 237 పరుగులు చేసినప్పటికీ ఓటమి తప్పలేదు. డల్లాస్ వేదికగా సియాటిల్ ఓర్కాస్, ఎంఐ న్యూయార్క్ జట్ల మధ్య రసవత్తర పోరు సాగింది. ఈ మ్యాచ్‌లో టాస్ గెలిచిన సియాటిల్ ఓర్కాస్ కెప్టెన్ సికందర్ రజా బౌలింగ్ ఎంచుకున్నాడు. తొలుత బ్యాటింగ్‌కి వచ్చిన ఎంఐ న్యూయార్క్ సియాటిల్ బౌలర్లను ఊచకోత కోసింది. వరుసగా విఫలమవుతున్న కెప్టెన్ ఈ రోజు మ్యాచ్‌లో తన బ్యాట్ పవరేంటో చూయించాడు. బౌండరీలతో ప్రత్యర్థి బౌలర్లపై విరుచుకుపడ్డాడు. ఓపెనర్ డికాక్ కేవలం ఒక్క పరుగుకే పెవిలియన్ బాట పట్టడంతో రెండో ఓవర్‌లో క్రీజులోకి వచ్చిన పూరన్ ఆరంభం నుంచి బౌండరీల మోత మోగించాడు. మోనన్క్ పటేల్ అవుటైన తర్వాత బ్యాటింగ్‌కి వచ్చిన తాజిందర్ ధిల్లాన్ కూడా సియాటిల్ బౌలర్లకు చుక్కలు చూయించాడు. వీరిద్దరూ కలిసి మూడో వికెట్‌కు ఏకంగా 158 పరుగుల భారీ భాగస్వామ్యం నెలకొల్పారు. తాజిందర్ ధిల్లాన్ 35 బంతుల్లో ఎనిమిది ఫోర్లు, ఎనిమిది సిక్సర్లతో 95 పరుగులు చేసి అవుట్‌ కాగా.. కెప్టెన్ పూరన్ 60 బంతుల్లో 7 ఫోర్లు, 8 సిక్సర్లతో 108 పరుగులతో నాటౌట్‌గా నిలిచాడు. దాంతో ఎంఐ న్యూయార్క్ 20 ఓవర్లలో 4 వికెట్ల నష్టానికి 237 పరుగులు చేసింది. 238 టార్గెట్‌తో బరిలోకి దిగిన సియాటిల్ ఓర్కాస్ 20 ఓవర్లలో లక్ష్యాన్ని ఛేదించి థ్రిల్లింగ్ విక్టరీని అందుకుంది. ఆరంభం నుంచి దూకుడుగా ఆడిన సియాటిల్‌కు కెప్టెన్ రజా ఇన్నింగ్స్‌ సహాయపడింది. పవర్ ప్లేలో రజా 9 బంతుల్లో ఆరు ఫోర్లు, ఒక సిక్సర్‌తో 30 పరుగులు చేశాడు. దాంతో పవర్ ప్లేలో సియాటిల్ 86 పరుగులు చేసింది. హెన్రిచ్ క్లాసెస్ 13 బంతుల్లో 26 పరుగులు చేసి అవుట్ కాగా, షిమ్రానో హెట్మెయర్ 40 బంతుల్లో 5 ఫోర్లు, 9 సిక్సర్లతో 97 పరుగులతో నాటౌట్‌గా నిలిచి మ్యాచ్‌ని గెలిపించాడు. ఈ విజయంతో సియాటిల్ ఈ సీజన్‌లో తొలి గెలుపును నమోదు చేసుకుంది. ఆరు మ్యాచ్‌లు ఆడిన సియాటిల్ జట్టు గెలిచిన ఏకైక మ్యాచ్ ఇదే.