O Parque Arqueolóxico da Arte Rupestre (PAAR) de Campo Lameiro converterase este verán no lugar de diversión arredor da cultura prehistórica galega cunha programación que inclúe máis de 400 actividades dirixidas especialmente ás familias que queiran achegarse á arqueoloxía dunha maneira lúdica e didáctica. Durante os meses de xullo, agosto e setembro, este enclave que alberga unha das maiores concentracións de petróglifos de Europa abrirá as súas portas de martes a domingo con horario ampliado para facilitar a estadía dos visitantes nesta paisaxe prehistórica de 22 hectáreas. Baixo o lema "Experiencias na prehistoria", o programa inclúe diversos obradoiros de recreación en sesións de mañá e tarde, onde os participantes poderán experimentar con técnicas ancestrais como a pintura rupestre ou a cerámica, ademais de participar en simulacións arqueolóxicas. Para aquelas persoas que buscan emocións máis intensas, o parque ofrece diariamente o 'escape room' "O tesouro das mouras" e o xogo interactivo "Petroaventura", onde aprender xogando será o obxectivo principal. As visitas guiadas realizaranse en dúas quendas diarias, unha de mañá e outra de tarde. Como en edicións anteriores, todos os venres a partir das 22:00 horas repetiranse as populares visitas nocturnas, nas que os asistentes descubrirán as estacións rupestres cunha iluminación especial mentres escoitan lendas relacionadas cos petróglifos. Entre as novidades deste ano destaca "Solpor no PAAR", unha experiencia que permitirá aos visitantes realizar un percorrido ao caer o sol, considerado o momento óptimo para observar os petróglifos. Esta actividade inclúe un paseo máis longo que remata no miradoiro do Outeiro das Ventaniñas, ofrecendo unha perspectiva única deste tesouro arqueolóxico. Outra das grandes apostas da programación son os tres eventos especiais mensuais. O primeiro será o PetroFest, un festival diurno que se celebrará o 26 de xullo con actuacións de Abril, Faia, Maruxa e Coralia Djs, ademais do mago Samuel Moreno. O 24 de agosto terá lugar Laeros, o Festival de Arte Rupestre que combina gastronomía con recreacións prehistóricas. Para pechar a tempada, os días 20 e 21 de setembro celebraranse as primeiras Xornadas Internacionais de Arte Rupestre Atlántica, coa participación de investigadores galegos e internacionais que analizarán o legado patrimonial dos petróglifos de Galicia. Todas estas propostas forman parte da campaña "Para gustos, cultura" da Consellería de Cultura, Lingua e Xuventude da Xunta de Galicia, que recolle máis de 3.400 iniciativas de 40 tipoloxías distintas por toda a comunidade. Para participar nas actividades do PAAR é necesario realizar unha reserva previa a través da web oficial do Parque. Presentación das actividades no Parque de Arte Rupestre de Campo LameiroXunta de Galicia