ప్రతి వ్యక్తి జీవితంలోనూ సొంత ఇల్లు అనేది ఒక గొప్ప కల. ఇల్లు అంటే కేవలం నాలుగు గోడలు, ఒక కప్పు ఉన్న కట్టడం మాత్రమే కాదు.. అది ఆర్థిక స్థిరత్వానికి, భద్రతకు, భావోద్వేగ బంధాలకు ప్రతీక. పేద, మధ్య తరగతి కుటుంబాలకు ఆస్తి మాత్రమే కాదు.. అదొక ఎమోషన్.. జ్ఞాపకాలను సృష్టించుకునే ఒక నివాసం. అయితే సొంతింటి కలను నెరవేర్చుకోవడం చాలా మందికి ఒక పెద్ద సవాలు. దానికి సరైన ప్లానింగ్, సేవింగ్స్, హౌస్ లోన్స్ వంటివి అవసరం అవుతాయి. అయితే ఇప్పుడు సొంతింటి కలను నిజం చేసుకోడానికి ఓ మిడిల్ క్లాస్ ఫ్యామిలీ ఎలాంటి కష్టాలు పడిందనే కథాంశంతో '3 బీహెచ్‌కే' అనే చిత్రాన్ని తెరకెక్కించారు. బొమ్మరిల్లు సిద్ధార్థ్‌, సీనియర్ నటుడు శరత్‌ కుమార్‌ ప్రధాన పాత్రల్లో '3 బీహెచ్‌కే' సినిమా రూపొందింది. ఇందులో దేవయాని, యోగి బాబు, మీటా రఘునాథ్, చైత్ర ముఖ్య పాత్రలు పోషించారు. శ్రీ గణేష్ దర్శకత్వం వహించిన ఈ చిత్రాన్ని శాంతి టాకీస్ బ్యానర్‌పై అరుణ్ విశ్వ నిర్మించారు. జూలై 4న ఈ సినిమాని తెలుగు, తమిళ భాషల్లో ప్రేక్షకుల ముందుకు తీసుకురానున్నారు. తెలుగులో మైత్రీ మూవీ మేకర్స్ సంస్థ విడుదల చేస్తోంది. ప్రమోషన్స్‌లో భాగంగా తాజాగా తెలుగు ట్రైలర్‌ రిలీజ్‌ చేసారు. సొంతింటి కలను నిజం చేసుకోడానికి ఓ మిడిల్ క్లాస్ ఫ్యామిలీ ఎలాంటి కష్టాలు పడిందనే స్టోరీ లైన్ తో '3 బీహెచ్‌కే' సినిమా తెరకెక్కినట్లు తెలుస్తోంది. మధ్యతరగతి కుటుంబాల కలలు, ఆశలు, ఆవేదనలను మనసుకు హత్తుకునేలా ఈ సినిమాలో చూపించినట్లు ట్రైలర్ చూస్తే అర్థమవుతోంది. శరత్‌ కుమార్‌, సిద్ధార్థ్‌ తండ్రీకొడుకులుగా తమ నటనతో ఆకట్టుకున్నారు. చాలా కాలంగా సరైన హిట్టు కోసం కష్టపడుతున్న సిద్దార్థ్.. ఈ సినిమాతో సక్సెస్ సాధిస్తారనిపిస్తోంది. చూద్దాం.. ఎలా ఉంటుందో.