ദുബൈ | അര്‍ബുദ രോഗത്തോട് പൊരുതി വിജയിച്ചവര്‍ക്ക് മ്യൂസിയം ഓഫ് ദി ഫ്യൂച്ചറില്‍ ആദരവ്. യു എ ഇയിലുടനീളമുള്ള 25 ആശുപത്രികളില്‍ നിന്നുള്ള 100 അതിജീവിതരെയാണ് എമിറേറ്റ്സ് ഓങ്കോളജി സൊസൈറ്റി ആദരിച്ചത്. യു എ ഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിന്‍ റാശിദ് അല്‍ മക്തൂമിന്റെ കരുതലില്‍ അതിജീവന യാത്ര നടത്തിയ 15 വയസ്സുള്ള ഫാത്വിമ അഹ്മദ് ഹസ്സനെയും ആദരിച്ചു. നേരത്തെയുള്ള കണ്ടെത്തല്‍, വിദഗ്ധ പരിചരണം, വൈകാരിക പിന്തുണ എന്നിവയിലൂടെ രക്ഷപ്പെട്ട, ജീവിതം ആഘോഷിക്കുന്ന അതിജീവിച്ചവരുടെ മാസത്തിന്റെ ഭാഗമായിരുന്നു ഈ ചടങ്ങ്.സാര്‍ക്കോമ കാന്‍സര്‍ ആയിരുന്നു ഫാത്വിമയ്ക്ക്. കണ്ടെത്തിയപ്പോള്‍, ആ കുടുംബം നിരാശയിലായിരുന്നു. ‘ശൈഖ് മുഹമ്മദ് ബിന്‍ റാശിദ് അല്‍ മക്തൂം എന്റെ മുഴുവന്‍ ചികിത്സയും സ്പോണ്‍സര്‍ ചെയ്തു.’ ഫാത്വിമ പറഞ്ഞു. ‘അത് എല്ലാം മാറ്റിമറിച്ചു. ശൈഖ് മുഹമ്മദിന്റെ ദയ എനിക്ക് എന്റെ പ്രതീക്ഷയും ആരോഗ്യവും സ്വപ്നങ്ങളും തിരികെ നല്‍കി.’ മാസങ്ങള്‍ നീണ്ട തീവ്രമായ ചികിത്സയ്ക്കു ശേഷം, ഫാത്വിമ ഇപ്പോള്‍ കാന്‍സര്‍ മുക്തയാണ്. ഒരു നഴ്‌സായി കരിയര്‍ പിന്തുടരാന്‍ അനുഭവം അവളെ പ്രചോദിപ്പിച്ചു. ‘നഴ്‌സുമാര്‍ എന്നെ സഹായിച്ചതുപോലെ മറ്റുള്ളവരെ സഹായിക്കാന്‍ ഞാന്‍ ആഗ്രഹിക്കുന്നു.’ അവര്‍ പറഞ്ഞു. ‘ആ വേദന അനുഭവിച്ച ഒരാള്‍ക്ക് മാത്രമേ ശരിക്കും മനസ്സിലാകൂ.’ലുക്കീമിയയെ അതിജീവിച്ച 11 വയസ്സുകാരന്‍ ഹംദാന്‍ സഈദ് അല്‍ ഫലാസിയെയും 2023-ല്‍ ഒരു പതിവ് പരിശോധനയില്‍ സ്തനാര്‍ബുദം ആണെന്നറിയുകയും അതിജീവിക്കുകയും ചെയ്ത ഫലസ്തീനിലെ ഗസ്സയില്‍ നിന്നുള്ള ദന്തഡോക്ടറും രണ്ട് കുട്ടികളുടെ മാതാവുമായ ഡോ. ഹിന്ദ് സലാമയെയും ആദരിച്ചു.