: చాట్ బాట్ సేవలతో చాట్‌జీపీటీని తీసుకొచ్చి సంచలనం సృష్టించిన సంస్థ.. ఇప్పుడు మరో కొత్త ఆవిష్కరణ చేసింది. కృత్రిమ మేధ సేవల్ని మరింత మెరుగ్గా అందించేందుకు ఇప్పుడు కొత్తగా సదుపాయం తీసుకొచ్చింది. మనుషులకు వర్చువల్ సహోద్యోగులుగా మారే ఏఐ ఏజెంట్ సేవల్ని ఇప్పుడు మరికొన్ని దేశాల్లో కూడా అందుబాటులోకి తెచ్చింది. తాజాగా దీనికి సంబంధించి.. సామాజిక మాధ్యమం ఎక్స్ వేదికగా వెల్లడించింది. యూజర్లు ఇచ్చే ప్రాంప్ట్‌ను ఆధారంగా చేసుకొని.. ఆన్‌లైన్‌లో ఆటోమేటిక్‌గా పనులు నిర్వహించే సామర్థ్యంతో ఈ ఏఐ ఏజెంట్ పనిచేస్తుంది. అమెరికాలో చాట్‌జీపీటీ ప్రో యూజర్లకు మాత్రమే ఈ సేవలు అందుబాటులోకి వచ్చాయి. ఇప్పుడు భారత్‌తో పాటు బ్రెజిల్, కెనడా, ఆస్ట్రేలియా, జపాన్, దక్షిణ కొరియా, యూకే, సింగపూర్‌లోనూ సేవల్ని యాక్సెస్ చేసే సదుపాయం కల్పించింది. ఐరోపా దేశాల్లో ఈ సేవలు అందుబాటులోకి తీసుకురాలేదని.. త్వరలోనే తీసుకొచ్చేందుకు సన్నాహాలు ప్రారంభించినట్లు ఓపెన్ ఏఐ తెలిపింది.అత్యంత క్లిష్టమైన ఆన్‌లైన్ టాస్కులు ఆటోమేటిక్‌గా నిర్వహించగలిగే సామర్థ్యంతో ఈ ఏఐ మోడల్ రూపొందించారు. ఆపరేటర్ కంప్యూటర్- యూజింగ్ ఏజెంట్‌ను ఆధారంగా చేసుకొని ఈ ఏఐ ఏజెంట్ పనులు చేస్తుంది. జీపీటీ- 4o, o3 మోడల్‌లోని అత్యాధునిక నైపుణ్యాలు కలిగి ఉంటాయి. ఒక ప్రత్యేక బ్రౌజర్లో ఈ ఏఐ ఏజెంట్ పనిచేస్తుంది. ఇక్కడ యూజర్లు వేరే కార్యకలాపాలపై దృష్టి సారించినప్పుడు స్వతంత్రంగా పనులు నిర్వర్తించగల సామర్థ్యం ఉండటం విశేషం. ఇది ఇంకా ఇమేజ్, టెక్ట్స్ తరహాలో ఇన్‌పుట్స్ కూడా స్వీకరిస్తుంది. లోపాలు పరిష్కరించడం, ఊహించని సవాళ్లకు అనుగుణంగా పనులు నిర్వర్తించడం, ఉత్పాదకత పెంచేందుకు ఏఐ ఏజెంట్ సాయం చేస్తుంది. >> సాఫ్ట్‌వేర్ కంపెనీలో చేసే పని ఈ AI Agents పూర్తి చేయగలవని గతంలో ఓపెన్ ఏఐ సీఈఓ సామ్ ఆల్ట్‌మన్ ఒక సందర్భంలో వెల్లడించారు. అయితే ఈ ఏజెంట్స్.. తమకు కేటాయించిన పని మాత్రమే పూర్తి చేయగలవని అన్నారు. గొప్ప ఆలోచనలతో మాత్రం అవి ముందుకురాలేవని చెప్పారు. అయితే ఇక్కడ మానవ ప్రమేయం అవసరం ఉంటుందన్నారు. ఈ క్రమంలో.. సాఫ్ట్‌వేర్ ఇంజినీర్లను ఇది పూర్తి స్థాయిలో భర్తీ చేయకపోయినా.. కొంత శాతమైనా ప్రభావం చూపిస్తుందని చెప్పొచ్చు.