അബുദാബി | യുഎഇയുടെ കാര്‍ഷിക മേഖലയുടെ വികസനത്തിനും സുസ്ഥിരത മുന്‍നിര്‍ത്തിയുള്ള മികച്ച പ്രവര്‍ത്തനങ്ങളും പരിഗണിച്ച് ശൈഖ് മന്‍സൂര്‍ ബിന്‍ സായിദ് അഗ്രികള്‍ച്ചറല്‍ എക്‌സലന്‍സ് അവാര്‍ഡ് ലുലു ഗ്രൂപ്പിന്് ലഭിച്ചു. എമിറേറ്റ്‌സ് പാലസില്‍ വച്ച് നടന്ന ചടങ്ങില്‍ യു.എ.ഇ കാലാവസ്ഥാ വ്യതിയാന പരിസ്ഥിതി മന്ത്രി ഡോ. അംന ബിന്‍ത് അബ്ദുല്ല അല്‍ ദഹക്ക് ലുലു ഗ്രൂപ്പ് എക്‌സിക്യൂട്ടീവ് ഡയറക്ടര്‍ അഷറഫ് അലി എം.എ ക്ക് അവാര്‍ഡ് സമ്മാനിച്ചു.അല്‍ വത്ബയിലെ ഷെയ്ഖ് സായിദ് ഫെസ്റ്റിവലില്‍ ലുലുവിന്റെ മികച്ച പ്രദര്‍ശനങ്ങളും പരിപാടികളും കൂടി പരിഗണിച്ചാണ് അവാര്‍ഡ്. ഷെയ്ഖ് സായിദ് ഫെസ്റ്റിവലില്‍ യുഎഇയുടെ തനത് കാര്‍ഷിക ഉത്പന്നങ്ങളുടെ പ്രത്യേകം പ്രദര്‍ശനങ്ങളും സ്റ്റാളുകളും ലുലു ഒരുക്കിയിരുന്നു. യുഎഇയിലെ വ്യത്യസ്ഥമായ പഴം ശേഖരങ്ങള്‍, പച്ചക്കറി പഴം ഉത്പന്നങ്ങള്‍ കൊണ്ടുള്ള വിഭവങ്ങള്‍, സ്‌പെഷ്യല്‍ പോള്‍ട്ടറി സെക്ഷന്‍, തേന്‍ ഉത്പന്നങ്ങളുടെ വിപുലമായ ശേഖരം എന്നിവ ഷെയ്ഖ് സായിദ് ഫെസ്റ്റിവലില്‍ ലുലു അവതരിപ്പിച്ചിരുന്നു.കൂടാതെ, യുഎഇയുടെ പ്രൗഢമായ പ്രാദേശിക സംസ്‌കാരം വിളിച്ചോതുന്ന ആകര്‍ഷകമായ പരിപാടികളും ലുലു ഒരുക്കിയിരുന്നു.ഭാവിതലമുറയ്ക്കായി സുസ്ഥിരതയുടെ പ്രാധാന്യം കൂടി വ്യക്തമാക്കിയായിരുന്നു പരിപാടികള്‍. കൂടാതെ, യുഎഇയിലെ കാര്‍ഷിക ഉത്പന്നങ്ങളുടെ കൂടുതല്‍ വിപണനത്തിനായി ലുലു സ്റ്റോറുകളില്‍ അല്‍ എമറാത്ത് അവ്വല്‍ സ്‌പെഷ്യല്‍ സ്റ്റാളുകളും സജ്ജീകരിച്ചിരുന്നു. യുഎഇയിലെ പഴം പച്ചക്കറി പാല്‍ പോള്‍ട്ടറി ഉത്പന്നങ്ങളുടെ വിപുലമായ ശേഖരമാണ് ലുലു സ്റ്റോറുകളിലുള്ളത്. യുഎഇയുടെ ഉത്പന്നങ്ങളുടെ വിപണനത്തിനൊപ്പം രാജ്യത്തെ കര്‍ഷകര്‍ക്ക് കൂടി കൈഞ്ഞാങ്ങാകുന്നതാണ് ലുലുവിന്റെ ഈ പദ്ധതി.