(កំពង់ធំ)៖ លោក ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន បានបញ្ជាក់ប្រាប់ក្រុមអ្នកសារព័ត៌មាន នៅក្នុងដំណើរបំពេញទស្សនកិច្ចថា ក្រសួងបរិស្ថាន បានគាំទ្រ និងបង្កើតសហគមន៍តំបន់ការពារធម្មជាតិ រហូតមកដល់ពេលនេះ មានចំនួន១៩៣ សហគមន៍ដែលមានសក្តានុពលមានជាងពាក់កណ្តាល។ សហគមន៍ទាំងនេះចង់សំដៅទៅលើសហគមន៍ ដែលការពារធម្មជាតិនឹងអាចទាញយកផលប្រយោជន៍សម្រាប់ការអភិវឌ្ឍនៅក្នុងសហគមន៍។អ្នកនាំពាក្យរូបនេះ បានបង្ហាញការយលឃើញពីសកម្មភាពរបស់សហគមន៍មួយចំនួន បានចូលរួមបង្ហាញអំពីសក្តានុពលរបស់ខ្លួនការអភិរក្សធនធានធម្មជាតិ និងការបង្កើតជីវភាពរបស់ខ្លួន នៅក្នុងសហគមន៍ ដែលកាលពីមុនពួកគាត់បានពឹងពាក់តែទៅលើការចូលព្រៃកាប់ឈើ បរបាញ់សត្វ ហើយងាកមកបង្កើតមុខរបរថ្មី ដោយមុខរបរនេះថែមទាំងបានជួយលើកកម្ពស់ជីវភាពរបស់គាត់នឹងបានចូលរួមការអភិរក្សធនធានធម្មជាតិផងដែរ ។លោក ខ្វៃ អាទិត្យា បានបញ្ជាក់ថា៖ «អ៊ីចឹង កន្លងមកនេះ យើងបានឃើញថាសហគមន៍ជារនាំងការពារធនធានធម្មជាតិ យ៉ាងសំខាន់ ក្នុងការអភិរក្សធនធានធម្មជាតិរបស់យើងផង ហើយក៏ដូចជាការចូលរួមក្នុងគម្រោងបៃតង តាមរយៈគម្រោងអភិរក្សតំបន់ធនធានធម្មជាតិនេះ (INRM) មានការចូលរួមពីអង្គការដៃគូពាក់ព័ន្ធ សហការ និងអភិវឌ្ឍន៍ផ្សេងៗជាច្រើនផងដែរ»។លោក ខ្វៃ អាទិត្យា បានវាយតម្លៃខ្ពស់ចំពោះគម្រោងការបញ្ច្រាបគ្រប់គ្រងធនធានធម្មជាតិតំបន់ទេសភាពនៃព្រៃធម្មជាតិ និងផលិតភាពធម្មជាតិនៅតំបន់ភាគខាងជើង នៃប្រទេសកម្ពុជា (INRM) បានចូលរួមចំណែកយ៉ាងសំខាន់ជាមួយក្រសួងបរិស្ថាន ជាពិសេសបានជួយសហគមន៍តំបន់ការពារធម្មជាតិ នៅក្នុងខេត្តកំពង់ធំ សៀមរាប និងខេត្តព្រះវិហារ បានកំពុងតែទទួលបានលទ្ធផលល្អប្រសើរ។ និងបានជួយការពារធនធានធម្មជាតិ ដោយឃើញថា គម្រប់បៃតង ជំរុញឱ្យប្រជាសហគមន៍ចេះស្រឡាញ់ព្រៃកាន់តែច្រើន។ ចំណុចនេះធ្វើឱ្យមានការស្របនឹងយុទ្ធសាស្ត្ររបស់ក្រសួងបរិស្ថាន មានដូចជាការជំរុញការដាំដើមឈើ បណ្ដុះកូនឈើជាដើម ពិសេស គឺយុទ្ធនាការពន្លកបៃតង។ក្នុងឱកាសនោះដែរ ក្នុងនាមក្រសួងបរិស្ថាន លោកបានប្រកាសគាំទ្រឱ្យគម្រោង INRM និងដៃគូអភិវឌ្ឍន៍ធ្វើការពិនិត្យនិងចូលរួមបន្ថែមទៀត ដល់មូលនិធិ ដល់គម្រោងនេះព្រោះថាគម្រោងនេះ បាននិងកំពុងតែទទួលផលវិជ្ជមាន ចំពោះការអភិវឌ្ឍជីវភាពប្រជាពលរដ្ឋ នៅក្នុងសហគមន៍ការពារធម្មជាតិ ក៏ដូចជាការផ្ដល់ការការពារធនធានធម្មជាតិដើម្បីកូនចៅជំនាន់ក្រោយ ។អ្នកនាំពាក្យក្រសួងបរិស្ថានរូបនេះ បានលើកឡើងថា យុទ្ធនាការពន្លកបៃតង គឺជាសកម្មភាពមួយដាក់ចេញតាមរយៈយុទ្ធសាស្ត្រចក្រាក្នុងវិស័យបរិស្ថាន របស់ក្រសួងបរិស្ថាន ដែលបានកំណត់នៅក្នុងអាណត្តិទី៧ របស់រាជរដ្ឋាភិបាល ហើយយុទ្ធសាស្ត្រនេះ ស្របនឹងយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល។«តាមរយៈការដាក់ការការពារតំបន់ធម្មជាតិនេះ នឹងធ្វើឱ្យតំបន់ការពារធម្មជាតិរបស់យើង កាន់តែរឹងមាំ កាលណាសហគមន៍ មានជីវភាពល្អ និងជម្រើសថ្មី ក្រៅពីការចូលព្រៃដែលពឹងពាក់លើវិស័យព្រៃឈើ»។ នេះជាការលើកឡើងបន្ថែមរបស់លោក ខ្វៃ អាទិត្យា។លោកបានបន្ថែមថា ក្រៅពីសកម្មភាពខាងលើ សកម្មភាពទាំងនេះ ក៏បានចូលរួមក្នុងការអភិរក្ស ក៏ដូចជាការទប់ស្កាត់ សកម្មភាពបទល្មើសនានា ដែលពាក់ព័ន្ធ និងធនធានធម្មជាតិ ដែលជាចំណុចសំខាន់ ក្នុងការយកចិត្តទុកដាក់និងចង់បានការចូលរួមពីភាគីពាក់ព័ន្ធ ពិសេសនោះ គឺសហគមន៍ផ្ទាល់ តែម្តង។សូមជម្រាបថា ការអភិវឌ្ឍរបស់សហគមន៍ បានទទួលការគាំទ្រពីក្រសួងបរិស្ថាន ទាំងស្មារតី និងសម្ភារជាបន្តបន្ទាប់ ជាពិសេសក្នុងឆ្នាំ២០២៤ ពីគម្រោង «ការបញ្ជ្រាបការគ្រប់គ្រងធនធានធម្មជាតិ ទៅក្នុងតំបន់ទេសភាព នៃព្រៃធម្មជាតិ និងផលិតភាពធម្មជាតិ នៅតំបន់ភាគខាងជើង នៃប្រទេសកម្ពុជា (INRM Project)» ក្នុងនោះគម្រោង INRM ដែលបានផ្តល់មូលនិធិដល់អង្គការមូលនិធិព្រះពុទ្ធសាសនា និងអភិវឌ្ឍន៍សហគមន៍ ដើម្បីធ្វើការជាមួយសហគមន៍ ក្នុងការពង្រឹងសមត្ថភាព និងជំនាញក្នុងការពង្រឹងជីវភាពសហគមន៍ និងការថែរក្សាព្រៃឈើសហគមន៍ ឱ្យបានល្អសម្រាប់កូនចៅរបស់គាត់៕