ఛాంపియన్స్ ట్రోఫీ గ్రూప్-బీలో బుధవారం ఇంగ్లండ్-అప్ఘనిస్తాన్ జట్లు పోటీపడుతున్నాయి. లాహోర్‌లోని గడాఫీ స్టేడియం వేదికగా ఈ మ్యాచ్ జరుగుతుంది. ఆస్ట్రేలియా-సౌతాఫ్రికా మధ్య మ్యాచ్ వర్షం కారణంగా ఆగిపోవడంతో ఈ మ్యాచ్ ఇంగ్లండ్, అప్ఘనిస్తాన్‌కు కీలకంగా మారనుంది. ఈ మ్యాచ్‌లో గెలిచిన జట్టుకు సెమీ ఫైనల్స్ చేరుకునే అవకాశం ఉంది. అప్ఘనిస్తాన్ జట్టు ఈ టోర్నీలో ఇప్పటికే సౌతాఫ్రికాతో తన తొలి మ్యాచ్ ఆడింది. టోర్నీ ప్రారంభానికి ముందు ఛాంపియన్స్‌గానే ఇక్కడ నుంచి వెళ్తామని చెప్పిన అప్ఘన్లు తొలి మ్యాచ్‌లో ఘోర పరాభవాన్ని మూటగట్టుకున్నారు. మ్యాచ్‌కి ముందు సఫారీలను మాటలతో రెచ్చగొట్టిన అప్ఘనిస్తాన్ 107 పరుగుల తేడాతో ఓటమిపాలయింది. తొలుత బ్యాటింగ్ చేసిన సౌతాఫ్రికా జట్టు 315 పరుగులు చేయగా అప్ఘనిస్తాన్ 208 పరుగులకే ఆలౌట్ అయింది. ఇంగ్లండ్ జట్టు టోర్నీలో తన తొలి మ్యాచ్‌ను ఆస్ట్రేలియాతో ఆడింది. తొలుత బ్యాటింగ్ చేసిన ఇంగ్లండ్ జట్టు 351 పరుగులు చేసి ఆసీస్‌ను కట్టడి చేయడంలో విఫలమయ్యారు. దాంతో ఆస్ట్రేలియా జట్టు 47.3 ఓవర్లలోనే ఈ స్కోర్‌ను ఛేదించి విజయం సాధించింది. బ్యాటింగ్‌లో బలంగా కనిపించిన ఇంగ్లండ్ జట్టు.. బౌలింగ్‌లో దారుణంగా విఫలమైంది. ఛాంపియన్స్ ట్రోఫీ పాయింట్ల పట్టిక ప్రకారం సౌతాఫ్రికా, ఆస్ట్రేలియా చెరి మూడు పాయింట్లతో వరుసగా ఒకటి, రెండు స్థానాల్లో ఉన్నాయి. ఇంగ్లండ్, అప్ఘనిస్తాన్ టీమ్స్ మాత్రం సున్నా పాయింట్లతో మూడు, నాలుగు స్థానాలకు పడిపోయాయి. లాహోర్ వేదికగా జరిగే ఇంగ్లండ్-అప్ఘనిస్తాన్ మ్యాచ్‌లో ఏ జట్టు గెలిస్తే ఆ జట్టుకు సెమీ చేరుకునే అవకాశం ఉంది. హెడ్ టు హెడ్ రిజల్ట్స్అప్ఘనిస్తాన్-ఇంగ్లండ్ జట్లు ఐసీసీ వేదికలపై మూడు సార్లు తలపడ్డాయి. ఇంగ్లండ్ జట్టు రెండు సార్లు విజయం సాధించగా, అప్ఘనిస్తాన్ ఒక్కసారి గెలిచింది. ఛాంపియన్స్ ట్రోఫీలో మాత్రం అప్ఘనిస్తాన్ ఆడటం ఇదే మొదటిసారి. ఈ మ్యాచ్‌లో ఎలాగైనా గెలిచి సెమీస్ రేసులో నిలవాలని అప్ఘన్లు ఉవ్విళ్లూరుతున్నారు. ఇంగ్లండ్ స్క్వాడ్బట్లర్ (కెప్టెన్), జెమీ స్మిత్, ఫిల్ సాల్ట్, బెన్ డకెట్, జో రూట్, హ్యారీ బ్రూక్, లియామ్ లివింగ్‌స్టన్, జోఫ్రా ఆర్చర్, ఆదిల్ రషీద్, మార్క్ ఉడ్, జెమీ ఓవర్టన్, రెహాన్ అహ్మద్, షాకీబ్ మహమూద్, టామ్ బాన్‌టన్, గస్ అట్కీసన్. అప్ఘనిస్తాన్ స్క్వాడ్హష్మతుల్లా షాహీద్ (కెప్టెన్), రహ్మానుల్లా గుర్బాజ్, ఇబ్రహీం జోర్డాన్, సెదికుల్లా అటల్, అజ్మతుల్లా, మహమ్మద్ నబీ, గుల్బదిన్ నాయబ్, రషీద్ ఖాన్, నూర్ అహ్మద్, ఫజల్ హక్ ఫరూఖీ, ఫరీద్ అహ్మద్ మాలిక్, ఇక్రమ్ అలీఖిల్, నవీద్ జర్దాన్.