Os dereitos e garantías da persoa na Era Dixital será o tema analizado por un curso do Centro Asociado da UNED en Pontevedra que impartirá, do 6 ao 20 de marzo, Joaquín Sarrión Esteve, profesor titular de Dereito Constitucional e Catedrático Jean Monnet na Universidade Nacional de Educación a Distancia. Este curso, que está coordinado polo responsable do Departamento de Extensión Universitaria e Actividades Culturais, Rafael Cotelo Pazos, e forma parte do ciclo "Investigación. Gobernanza e Regulación na Era Dixital", no marco das actividades da "Cátedra Jean Monnet Gobernanza e Regulación na era Dixital Proxecto". Esta actividade formativa ten como obxectivo explicar os aspectos máis relevantes que a transformación dixital ten para as persoas físicas, desde o punto de vista da protección e tutela dos seus dereitos e liberdades, considerando o uso masivo de datos (Big Data) e os emerxentes sistemas de Intelixencia Artificial. Así, analizaranse os desafíos que expón a transformación dixital, en especial sobre os eixos de gobernanza (Estado de Dereito, sistema institucional, dereitos) e regulación (lexislación, softlaw, dereitos). Tamén se atenderá aos retos que se expón esta transformación para as persoas e os seus dereitos no mundo online (dereitos fundamentais, dereitos e principios dixitais) como cidadáns, e tamén como usuarios/consumidores. O desenvolvemento do curso será online, en directo ou en diferido, incluído o taller final do día 20 de marzo, que poderá ser seguido igualmente online en directo ou en diferido. O programa que se desenvolverá neste curso comeza o xoves 6 de marzo, de 17 a 20 horas, coa presentación da Cátedra Jean Monnet onde se analizará a gobernanza e o sistema institucional ante a dixitalización. A segunda sesión, do 11 de marzo, virará en torno ao dereito e a evolución da regulación ante a dixitalización; a Transformación Dixital e status das persoas (os dereitos e garantías; os principios e dereitos dixitais); a cidadanía ante a dixitalización e os consumidores e usuarios ante a dixitalización. O xoves, 13 de marzo terá lugar a terceira sesión sobre o Dereito europeo da ciencia e a tecnoloxía na era dixital: aproximación á futura regulación da Intelixencia Artificial. Tamén se abordará o Dereito europeo da ciencia e a tecnoloxía e a análise da regulación da Lei de Intelixencia Artificial e as súas novidades. A cuarta sesión, previa ao taller práctico que dá fin ao curso, centrarase na Gobernanza e regulación dos datos na Unión Europea, os dereitos vencellados á protección de datos de carácter persoal; o marco xurídico do tratamento de datos persoais e non persoais na Unión Europea e o dereito fundamental de protección de datos de carácter persoal. Dereitos, garantías e perspectivas.