O Concello de Vilagarcía de Arousa celebrou este domingo 23 de febreiro o Día de Rosalía cun programa de actos que puxo en valor a figura da ilustre escritora galega. A Biblioteca Municipal Rosalía de Castro foi o epicentro das actividades, acollendo a apertura dunha mostra bibliográfica dedicada á autora de Cantares Gallegos. A exposición, que permanecerá aberta ao público ata o mércores 12 de marzo, está situada nunha zona destacada do recibidor da biblioteca. A través de varias vitrinas e estantes, os visitantes poden mergullarse na vida e obra de Rosalía de Castro. A mostra inclúe unha selección de libros que abarcan parte da súa produción literaria, así como estudos biográficos e análises da súa obra. Ademais, os máis novos contan cun espazo propio, con obras adaptadas ao público infantil e xuvenil, o que fai desta exposición unha experiencia para todas as idades. Paralelamente, o teatro itinerante Sempre Rosalía pechou a súa xira durante a xornada do domingo, no Día de Rosalía, con varias representacións nos centros socioculturais da cidade. Durante a mañá, as funcións tiveron lugar no Centro Cultural de Solobeira e en Rubiáns, mentres que pola tarde o elenco actuou nos Borrizos de Cornazo, na Laxe, no Centro Cultural Grupo de San Roque e no Breogán do Piñeiriño. A obra, interpretada por Ana Ponte no papel de Rosalía de Castro e Diego Freire como un dos seus biógrafos, ofrece unha visión intimista e poética da escritora. O argumento, baseado nun diálogo entre ambos personaxes, combina humor e emoción, achegando ao público unha perspectiva única da vida e legado de Rosalía.