Recoñecemento póstumo a nivel internacional para Pablo Hinojar. O pontevedrés, figura clave da ximnasia local e nacional e falecido tristemente de maneira repentina o pasado mes de outubro, foi seleccionado pola Federación Europea de Ximnasia (European Gymnastics) como un dos cinco candidatos a mellor adestrador continental do ano 2024. É unha homenaxe que a ximnasia europea lle brinda por todos os seus anos de dedicación e participación en grandes eventos internacionais como seleccionador nacional español de ximnasia acrobática. De feito, European Gymnastics recoñece no seu nomeamento o feito de que sexa adestrador principal en tres disciplinas (DMT, tumbling e ximnasia acrobática) así como adestrador persoal da campioa mundial Melania Rodríguez á que "desafiou a traspasar os seus límites", destaca a Federación. Ademais fala de Hinojar como "unha gran figura na nosa comunidade durante moitos anos e un querido amigo". Trátase duns premios que se deciden por votación popular, aberta ata este mércores 26 de febreiro. Os outros candidatos ao galardón de mellor adestrador europeo de ximnasia son o italiano Enrico Casella (ximnasia artística feminina), a ucraína Iryna Gorbacheva (ximnasia artística masculina), o suízo Laurent Guelzec (ximnasia artística masculina) e a bielorrusa Volha Ulasava (trampolín). Todos os nomeamentos son resultado das achegas dos comités técnicos da federación europea, autoridades e representantes de 50 federacións nacionais.