Latest Gold Silver Rates: బంగారం కొనుగోలు చేయాలనుకునే వారికి భారీ ఊరట కలిగింది. గోల్డ్ రేట్లు క్రమంగా దిగొస్తున్నాయి. ఇటీవల అంతర్జాతీయంగా అనిశ్చిత పరిస్థితుల నేపథ్యంలో వరుసగా పెరుగుకుంటూనే పోయిన పసిడి ధరలు ఎట్టకేలకు దిగొస్తున్నాయి. ఇటీవల ఆల్ టైమ్ గరిష్ట స్థాయిల నుంచి ఇన్వెస్టర్లు లాభాల్ని సొమ్ము చేసుకునే క్రమంలో ప్రాఫిట్ బుకింగ్‌కు పాల్పడగా.. ఇప్పుడు మాత్రం ఇంటర్నేషనల్ మార్కెట్ల నుంచి బలహీన సంకేతాలు.. అదే విధంగా యూఎస్ డాలర్ పుంజుకుంటుండటం వంటివి పతనం అయ్యేందుకు దోహదం చేస్తున్నాయి. ఇంటర్నేషనల్ మార్కెట్లో భారీగా పతననం కాగా.. అది ఇవాళ దేశీయంగా ఉదయం 10 గంటల తర్వాత ప్రభావం చూపిస్తుందని చెప్పొచ్చు. ఈ క్రమంలోనే వరుసగా రెండు రోజుల్లో గోల్డ్ రేటు పడిపోవడం విశేషం. చాలా రోజుల తర్వాత ఇలా జరిగింది. దేశీయంగా చూస్తే హైదరాబాద్ నగరంలో ఒక్కరోజే 22 క్యారెట్ల రూ. 400 తగ్గింది. దీంతో ఇప్పుడు తులం గోల్డ్ రేటు రూ. 80,100 కు పడిపోయింది. దీనికి ముందటి రోజు కూడా రూ. 250 తగ్గింది. ఇక ఇదే సమయంలో 24 క్యారెట్ల స్వచ్ఛమైన బంగారం ధర విషయానికి వస్తే.. తాజాగా రూ. 440 తగ్గగా 10 గ్రాములకు రూ. 87,380 కి పడిపోయింది. ఇక్కడ ముందటి రోజు రూ. 270 తగ్గింది. దీనికి ముందు వరుస సెషన్లలో భారీగా పెరిగి ఆల్ టైమ్ గరిష్ట స్థాయిల వద్ద కూర్చుంది. ఎట్టకేలకు ఇప్పుడు పడిపోతుండటంతో ఊపిరి పీల్చుకుంటున్నారు. మరోవైపు దేశ రాజధాని ఢిల్లీలో హైదరాబాద్ కంటే రేట్లు కాస్త ఎక్కువ స్థాయిలో ఉంటాయి. స్థానికంగా ఉండే పన్ను రేట్లు.. ఇతర అంశాల వల్ల ఇలా జరుగుతుంది. ఇక్కడ 22 క్యారెట్ల పుత్తడి ధర తులం రూ. 80,250 వద్ద ఉండగా.. మరోవైపు 24 క్యారెట్ల స్వచ్ఛమైన పసిడి ధర 10 గ్రాములు రూ. 87,530 పలుకుతోంది. బంగారం ధరలు తగ్గినప్పటికీ వెండి రేట్లు స్థిరంగానే కొనసాగుతున్నాయి. ఢిల్లీలో ప్రస్తుతం కేజీ సిల్వర్ రేటు రూ. 98 వేల వద్ద ఉంది. ముందటి రోజు ఇది రూ. 3 వేలు పడిపోవడం విశేషం. హైదరాబాద్‌లో కూడా స్థిరంగానే ఉండగా.. కేజీకి రూ. 1.06 లక్షలు పలుకుతోంది. దేశీయంగా ఇలా ఉంటే.. మరోవైపు అంతర్జాతీయ మార్కెట్లో ధరలు భారీగా పడిపోయాయి. కిందటి రోజు సరిగ్గా ఇదే సమయానికి (ఉదయం 6.30 గంటలు) స్పాట్ గోల్డ్ రేటు ఔన్సుకు (31.10 గ్రాములు) ఏకంగా 2920 డాలర్లకుపైగా ట్రేడవగా.. ఒక్కరోజు వ్యవధిలో ఇది 40 డాలర్లకుపైగా పతనమై ఇప్పుడు 2880 డాలర్ల దిగువ స్థాయికి పడిపోయింది. స్పాట్ సిల్వర్ రేటు కూడా భారీగా తగ్గి 31.30 డాలర్ల వద్ద ట్రేడవుతోంది. ఇదే సమయంలో డాలర్ పుంజుకుంటున్న క్రమంలో.. రూపాయి పతనం కొనసాగుతోంది. ప్రస్తుతం రూపాయి మారకం విలువ రూ. 87.32 వద్ద ఉంది.