തിരുവനന്തപുരം | ആശാ വര്‍ക്കര്‍മാര്‍ സെക്രട്ടേറിയറ്റിന് മുന്നില്‍ നടത്തുന്ന രാപകല്‍ സമരം 13ാം ദിനത്തില്‍ കടന്നു. സമരവേദിയിലേക്ക് വിവിധ ജില്ലകളില്‍ നിന്ന് ആശമാരെത്തി. കോണ്‍ഗ്രസ്സ് ഉള്‍പ്പെടെ വിവിധ രാഷ്ട്രീയ, സാമൂഹ്യ സംഘടനകളും പിന്തുണയുമായി എത്തുന്നുണ്ട്. രമേശ് ചെന്നിത്തലയുടെ നേതൃത്വത്തില്‍ കോണ്‍ഗ്രസ്സ് നേതാക്കള്‍ ഇന്ന് സമര പന്തലിലെത്തി ഐക്യദാര്‍ഢ്യം പ്രഖ്യാപിച്ചു.കെ പി സി സി അധ്യക്ഷന്‍ കെ സുധാകരന്‍, കോണ്‍ഗ്രസ്സ് നേതാക്കളായ എം എം ഹസന്‍, വി എസ് ശിവകുമാര്‍, അഡ്വ. എം ലിജു, കെ എസ് ശബരീനാഥ്, ചാണ്ടി ഉമ്മന്‍ എം എല്‍ എ തുടങ്ങിയവര്‍ കഴിഞ്ഞ ദിവസം സമരപ്പന്തല്‍ സന്ദര്‍ശിച്ച് പിന്തുണ നല്‍കിയിരുന്നു. സെക്രട്ടേറിയറ്റിന് മുന്നില്‍ നടന്ന ആശാ വര്‍ക്കര്‍മാരുടെ മഹാസംഗമത്തില്‍ പങ്കെടുത്തവരെയും പണിമുടക്കിലേര്‍പ്പെട്ടവരെയും സി പി എം, സി ഐ ടി യു എന്നിവയുടെ നേതൃത്വത്തില്‍ ഭീഷണിപ്പെടുത്തുകയാണെന്നും ഇതുകൊണ്ട് സമരത്തെ തകര്‍ക്കാന്‍ കഴിയില്ലെന്നും കേരള ആശ ഹെല്‍ത്ത് വര്‍ക്കേഴ്സ് അസ്സോസിയേഷന്‍ ഭാരവാഹികള്‍ പറഞ്ഞു.ഈ മാസം 10ന് ആരംഭിച്ച സമരം സമവായത്തിലെത്തിക്കുന്നതിന്റെ ഭാഗമായി മുടങ്ങിക്കിടന്ന ശമ്പള കുടിശ്ശികയുടെ വിതരണം സര്‍ക്കാര്‍ ആരംഭിച്ചെങ്കിലും മറ്റ് ആവശ്യങ്ങള്‍ കൂടി അംഗീകരിക്കാതെ സമരം അവസാനിപ്പിക്കില്ലന്നാണ് ആശാ വര്‍ക്കര്‍മാരുടെ നിലപാട്.