ప్రపంచ అపర కుబేరుడు.. టెస్లా, స్పేస్ ఎక్స్, ఎక్స్ సంస్థల అధినేత ఎలాన్ మస్క్ సంతానం గురించి తెలిసిందే. ఇటీవలె ఆయనకు మొత్తం 14 మంది పిల్లలు అని వార్తలు వచ్చాయి. వేర్వేరు మహిళలతో ఎలాన్ మస్క్.. ఈ 14 మంది పిల్లలకు జన్మనిచ్చారని తెలుస్తోంది. అయితే తాజాగా ఆయనకు మరో సంతానం ఉన్నట్లు ది న్యూయార్క్ టైమ్స్ తాజాగా ప్రచురించిన ఒక వార్త సంచలనంగా మారింది. ఎలాన్ మస్క్ ఒక జపనీస్ పాప్ స్టార్‌తో కలిసి ఒక బిడ్డను కన్నట్లు ఆ నివేదిక వెల్లడించింది. ఎలాన్ మస్క్‌తో తాను ఒక కొడుకును 2024లో కన్నట్లు ఆష్లే సెయింట్ క్లైర్‌ అనే 26 ఏళ్ల మహిళ.. ఆరోపణలు చేసినట్లు ది న్యూయార్క్ టైమ్స్ మరో కొత్త కథనాన్ని వెలుగులోకి తీసుకువచ్చింది. జపనీస్ పాప్ స్టార్‌తో సహా ప్రపంచవ్యాప్తంగా పలువురు పిల్లలకు తాను తండ్రిని అని ఎలాన్ మస్క్ చెప్పినట్లు ఆష్లే సెయింట్ క్లైర్ వెల్లడించిందని ది న్యూయార్క్ టైమ్స్ తెలిపింది. అంతాకాకుండా అడిగిన వారికి తన వీర్యాన్ని కూడా ఇస్తానని ఎలాన్ మస్క్ తనతో చెప్పినట్లు వివరించింది. ఇదే కాకుండా ప్రపంచవ్యాప్తంగా జననాల రేటు తగ్గడంపై ఎలాన్ మస్క్ తీవ్ర ఆందోళన చెందుతున్నారని.. తన వీర్యకణాలు అడిగిన వారికి ఇచ్చానని పేర్కొంది. అయితే ఆ జపానీస్ పాప్ స్టార్ ఎవరు అనేది మాత్రం చెప్పలేదని ఆమె తెలిపింది.అయితే ఇలా వీర్యదానం చేసి పిల్లలను కనడం అనేది.. వారికి సహాయం చేసినట్లు అనిపించేలా చేసినట్లు సెయింట్ క్లైర్ చెప్పినట్లు న్యూయార్క్ టైమ్స్ వెల్లడించింది. ఇప్పటికే నలుగురు మహిళల ద్వారా 14 మంది సంతానాన్ని కలిగి ఉన్నారు. వీరిలో కెనెడియన్ మ్యూజిషియన్ గ్రిమ్స్, ఎలాన్ మస్క్‌కు చెందిన న్యూరాలింక్ ఎగ్జిక్యూటివ్ షివోన్ జిలిస్ ఉన్నారు. సెయింట్ క్లైర్‌తో సంబంధం వల్ల ఎలాన్ మస్క్‌కు 13వ బిడ్డ కలిగినట్లు ఆరోపణలు వెల్లువెత్తాయి. ఇందులో అతని మొదటి భార్య జస్టిన్ విల్సన్‌తో ఐదుగురు పిల్లలు.. గాయని గ్రిమ్స్‌తో ముగ్గురు పిల్లలు.. న్యూరాలింక్ ఎగ్జిక్యూటివ్ శివోన్ జిలిస్‌తో ముగ్గురు సంతానం.. ఇప్పుడు రోములస్ ఉన్నారు.అయితే ఎలాన్ మస్క్‌కు ఉన్న మొత్తం పిల్లల సంఖ్య అనుకున్న దానికన్నా ఎక్కువగా ఉంటుందని న్యూయార్క్ టైమ్స్ నివేదిక సూచించింది. ఈ నివేదిక ప్రకారం.. జపాన్ అధికారులు తనను ఒక ఉన్నత స్థాయి మహిళకు స్పెర్మ్ డోనర్‌గా ఉండమని అడిగారని ఎలాన్ మస్క్ పేర్కొన్నట్లు తెలుస్తోంది. జపాన్ అధికారులు తనను స్పెర్మ్ డోనర్‌గా ఉండాలని కోరుకున్నారని.. ఇందులో ప్రేమ సహా మరేది లేదని.. కేవలం స్పెర్మ్ మాత్రమేనని మస్క్ చెప్పినట్లు నివేదిక వెల్లడించింది.సెయింట్ క్లైర్‌తో గతేడాది సెప్టెంబర్‌లో ఎలాన్ మస్క్ ఒక మగ బిడ్డకు తండ్రి అయినట్లు తెలుస్తోంది. అయితే ఈ బిడ్డను, వారి మధ్య రహస్య సంబంధాన్ని దాచాలని ఎలాన్ మస్క్ అనుకున్నాడని.. సమాచారం. ఇందుకోసం 15 మిలియన్ డాలర్లు అంటే భారత కరెన్సీలో దాదాపు రూ.130 కోట్లు ఆఫర్ చేశాడని.. దానికి తోడు తమ బిడ్డకు 21 ఏళ్లు వచ్చే వరకు.. నెలకు లక్ష డాలర్లు అంటే భారత కరెన్సీలో దాదాపు రూ.85 లక్షలు చెల్లిస్తానని చెప్పినట్లు క్లైర్ తెలిపింది. అమెరికా అధ్యక్షుడిగా డొనాల్డ్ ట్రంప్ ఎన్నికైన తర్వాత మార్-ఎ-లాగో పార్టీలో ఎలాన్ మస్క్ తనకు తెలియదని నటించాల్సి వచ్చిందని క్లై్ర్ చెప్పింది.