突然老婆話後晚約咗朋友食飯，咁得番一支公，就當然乘機搵老友出嚟食飯聚一聚。老友發辦，搵咗呢間晌東方街嘅「泰樂小排檔」，真喺唔嚟唔知，呢條街可謂旺中帶靜，而老友話佢哋啲菜式都特別，比較家庭式經營，值得一試。餐廳環境唔大，小弟就未去過泰國，所以，唔知當地啲「大排檔」喺點樣，但呢度嘅觀感就好有種大眾食堂嘅感覺，最特色喺地下嘅花磚同牆身嘅牌仔裝飾，有啲懷舊風。食物選擇，一張A4呎吋餐牌就羅列晒所以菜式，由沙律、香脆小食、惹味時蔬、泰式咖喱、泰樂招牌菜、泰式湯品、泰式粉麵、泰式甜品……等等，可謂麻雀雖小，五臟俱全，夠多樣化。飲品方面，除咗一啲港式飲品之外，就仲有多款特色沙冰同泰式飲品。本來好想飲沙冰，但今晚竟然無，都唔緊要，泰式特飲都有好多選擇。順帶一提，呢度唔收加一架，讚！泰式蝶豆花梳打特飲加青檸 $28、泰式龍眼冰 $28近來天氣酷熱，先嚟兩杯凍飲。朋友未試過蝶豆花喺乜嘢嚟，就試試看。其實蝶豆花無咩味，但亮點喺倒落梳打度會變成紫色，令賣相變得夢幻漂亮，加咗新鮮青檸汁，佢就話入口好清爽。小弟就稍稍偏愛龍眼冰，貪其清潤，而一邊飲住凍飲，一邊食住啲辣嘢，喺幾過癮。泰式豬頸肉生菜包 $88平常會揀個泰式沙律嚟先開開胃，今見有生菜包喺配豬頸肉，反而想試吓佢。從餐牌所見，佢都已有個火焫焫標記，原來，又真喺幾有辣勁，但包咗生菜食，就幾有減辣效果，再者，啲豬頸肉似用燒烤方式製作，有焦香感，切得厚薄均一，口感爽爽哋，又帶有少少油脂香，別具風味。虎蝦青咖喱 $128+薄餅 $20向來泰式咖喱都有一手，又紅、又黃、又青，亦討唔少人歡心，配虎蝦，再襯一份薄餅就最好不過。啲咖喱汁推得真喺幾唔錯喎，辛辣唔嗆喉，又滲出微微香料味，啲虎蝦食落好爽口，喺嫌份量唔多食得唔夠喉；咖喱內仲有啲豬紅同豆角，而薄餅本身做得好有牛油香，再沾上咖喱當然更加好食。Happy Thai 排骨船麵配金邊粉 $88用得店名作為菜式起頭，必然喺招牌嘢，單睇名字以為就咁喺碗排骨湯粉，嚟到先喺有種震撼感，大大嚿火山排骨實在夠霸氣，再伴有好多炸豬皮，立時變得好泰式，此外，仲有啲肉丸、通菜，喺一道非常豐富嘅湯粉。而排骨好好味，肉質鬆化，豬皮嗦滿湯汁，好食，再者，湯頭濃香不膩，差啲就飲光晒，金邊粉亦好滑溜。小店越夜越多人，而且，有唔少外賣單，幾時都話，食物做得好，有實力就唔怕無生意。總結而言，食物嘅性價比高，招呼又好，食堂感覺，輕鬆自在。個人評分 味道：8/10 環境：7/10 服務：8/10 抵食：9/10 平均每人消費：HK$190餐廳資料： 泰樂小排檔 Happy Thai 地址：油麻地東方街8A號地舖 電話：5978 2832