Gold Rates: అమెరికా- చైనా మధ్య వాణిజ్య ఒప్పందం ఓ కొలిక్కి వచ్చినట్లు వార్తలు వచ్చిన క్రమంలో అంతర్జాతీయ మార్కెట్లు సానుకూలంగా స్పందించాయి. ఆ ప్రభావం దేశీయ మార్కెట్లలోనూ కనిపించింది. ఈ క్రమంలోనే బంగారం పెట్టుబడుల్లో లాభాల స్వీకరణకు మదుపరులు మొగ్గు చూపారు. దీంతో వరుసగా రెండో రోజూ దిగివచ్చాయి. అంతర్జాతీయ అనిశ్చితులు తగ్గుముఖం పట్టడం, డాలర్ విలువ పెరుగుతుండడంతో బంగారానికి గిరాకీ తగ్గి ధరలు దిగివస్తున్నాయి. ఈ ప్రభావం దేశీయ మార్కెట్లపై పడుతోంది. గత వారం రోజులు వరుసగా పెరుగుతూ ఆందోళన కలిగించిన బంగారం రేట్లు ఇప్పుడు వరుసగా పడిపోతుండడం ఊరట కలిగించే విషయంగా చెప్పవచ్చు. బంగారం కొనేందుకు ఇదే మంచి సమయమని బులియన్ మార్కెట్ వర్గాలు సూచిస్తున్నాయి. ఈ క్రమంలో జూన్ 10వ తేదీన హైదరాబాద్ మార్కెట్లో పసిడి ధరలు ఎంతెంత ఉన్నాయో తెలుసుకుందాం. అంతర్జాతీయ మార్కెట్లో బంగారం ధరలు క్రితం రోజుతో పోలిస్తే స్వల్పంగా తగ్గాయి. ఇవాళ స్పాట్ గోల్డ్ రేటు ఒక ఔన్సుకు 3304 డాలర్ల వద్ద ట్రేడవుతోంది. ఇక స్పాట్ సిల్వర్ 1 ఔన్సుకు 36.44 డాలర్ల వద్ద ట్రేడవుతోంది. ఇక భారత కరెన్సీ రూపాయి మారకం విలువ గ్లోబల్ మార్కెట్లో డాలర్‌తో పోలిస్తే కాస్త కోలుకుని రూ.85.660 వద్ద ఉంది.హైదరాబాద్‌లో మళ్లీ తగ్గిన బంగారం ధర22 క్యారెట్ల ఆభరణాల గోల్డ్ రేటు క్రితం రోజు రూ.1500 మేర తగ్గగా ఇవాళ మరో రూ. 250 తగ్గింది. దీంతో తులం రేటు రూ. 89 వేల 550 వద్దకు దిగివచ్చింది. ఇక 24 క్యారెట్ల స్వచ్ఛమైన పసిడి ధర క్రితం రోజు రూ. 1630 మేర తగ్గిన సంగతి తెలిసిందే. ఇవాళ మరో రూ.280 మేర దిగివచ్చింది. దీంతో తులం ధర రూ. 97 వేల 690 వద్దకు పడిపోయింది. స్థిరంగానే వెండి ధరబంగారం ధరలు వరుసగా తగ్గుతున్నా వెండి రేటు మాత్రం గరిష్ఠ స్థాయులోనే కొనసాగుతోంది. వరుసగా నాలుగో రోజూ ఏ మార్పు లేదు. ప్రస్తుతం కిలో వెండి ధర హైదరాబాద్ మార్కెట్లో రూ. 1,18,000 మార్క్ వద్దే ట్రేడవుతోంది. బంగారం ధరలు దిగివస్తున్న క్రమంలో వెండి ధర సైతం తగ్గవచ్చని బులియన్ మార్కెట్ వర్గాలు అంచనా వేస్తున్నాయి. అయితే, నాలుగు రోజులుగా మాత్రం స్థిరంగానే ఉన్నాయి. ఈ కథనంలో పేర్కొన్న బంగారం, వెండి రేట్లు జూన్ 10వ తేదీన మంగళవారం ఉదయం 7 గంటల సమయంలో ఉన్నవి. అయితే, మధ్యాహ్నానికి పసిడి ధరలు మారవచ్చు. దీంతో పాటు పన్నులు కలిపి లెక్కిస్తే ధరలు ఇంకా ఎక్కువే ఉంటాయి. అవి కూడా ప్రాంతాలను బట్టి మారతాయి. కొనే ముందు స్థానికంగా తెలుసుకోవడం మంచిది.