منی پور میں میتی تنظیم آرم بائی ٹینگول کے رہنماؤں کی گرفتاری کے خلاف اتوار کو بھی احتجاج جاری رہا۔ انتظامیہ نے وادی امپھال کے پانچ اضلاع میں پابندیاں عائد کر دی ہیں اور انٹرنیٹ خدمات کو معطل کر دیا گیا ہے۔ عہدیداروں نے بتایا کہ مظاہرین نے احکامات کی خلاف ورزی کی اور امپھال مغربی ضلع کے اریپوک اور کوئرنگی اور امپھال مشرق کے کھرئی میں سڑکوں پر ٹائر جلائے جانے کی خبریں ہیں۔کوئرنگی میں مظاہرین نے سیکورٹی فورسز کی نقل و حرکت کو روکنے کے لیے سڑک کو کھود کر مرکزی سڑکوں پر مٹی کے ڈھیر لگا دیے۔ایسا محسوس ہو رہا ہے جیسے سڑکوں کو میدان جنگ میں تبدیل کیا جا رہا ہے! اسی طرح کے مظاہرے آسام کے پڑوسی ضلع جریبام میں بھی دیکھے گئے۔ پرتشدد مظاہرے شروع ہونے کے بعد ہفتہ کی رات سے امپھال مغرب، امپھال مشرق، تھوبل، بشنو پور اور کاکچنگ اضلاع میں پابندیاں عائد کر دی گئی ہیں۔ اس کے ساتھ ہی وادی کے ان علاقوں میں انٹرنیٹ اور موبائل ڈیٹا سروسز کو معطل کر دیا گیا ہے، جس میں وی سیٹ اور وی پی این کی سہولیات بھی شامل ہیں۔ریاست میں بگڑتی ہوئی صورتحال کے پیش نظر منی پور کے گورنر اجے کمار بھلا نے اتوار کو سینئر حکام کے ساتھ سیکورٹی جائزہ میٹنگ کی۔ راج بھون کی طرف سے جاری کردہ ایک بیان میں کہا گیا ہے کہ گورنر نے ارکان اسمبلی کے ایک وفد سے بھی ملاقات کی جس نے گورنر کو ریاست میں امن و امان کی موجودہ صورتحال سے آگاہ کیا اور اس کا حل تلاش کرنے میں مدد کے لیے ان کی مداخلت کی درخواست کی۔ وفد میں بھارتیہ جنتا پارٹی اور کانگریس کے کم از کم 20 ایم ایل اے شامل تھے۔گورنر سے ملاقات کے بعد، بی جے پی ایم ایل اے کے ایبومچا، جو وفد کا حصہ تھے، نے کہا کہ تشدد کے سابقہ واقعات کے سلسلے میں کل پانچ افراد کو گرفتار کیا گیا ہے، جس کی وجہ سے ریاست میں ہفتہ سے بڑے پیمانے پر احتجاج شروع ہوا۔ ایبومچا نے یہ بھی بتایا کہ پانچ گرفتار افراد میں سے ایک کو مرکزی تفتیشی بیورو (سی بی آئی) نے گرفتار کیا ہے۔ سنٹرل بیورو آف انویسٹی گیشن (سی بی آئی) نے اتوار کو امپھال ہوائی اڈے سے آرام بائی ٹینگول تنظیم کے ایک رکن کو منی پور میں 2023 میں ہونے والے تشدد سے متعلق مجرمانہ سرگرمیوں میں مبینہ طور پر ملوث ہونے کے الزام میں گرفتار کیا۔سی بی آئی نے اپنے بیان میں کہا کہ گرفتار شخص کو امپھال سے گوہاٹی لایا گیا ہے اور اسے پولیس ریمانڈ کے لیے مجاز عدالت میں پیش کیا جائے گا۔ لام لائی اسمبلی حلقہ کے ایم ایل اے کے ایبومچا نے کہا، "میٹنگ کے دوران ہمیں اطلاع ملی کہ پانچ لوگوں کو گرفتار کیا گیا ہے۔ ان میں سے ایک کنن سنگھ کو سی بی آئی نے ایک معاملے میں گرفتار کیا ہے‘‘کمشنر کم سکریٹری (ہوم) این اشوک کمار کے ذریعہ جاری کردہ حکم نامے میں کہا گیا ہے، "امپھال مغرب، امپھال مشرق، تھوبل، کاکچنگ اور بشنو پور اضلاع میں امن و امان کی موجودہ صورتحال کے پیش نظر، یہ خدشہ ہے کہ کچھ سماج دشمن عناصر اشتعال انگیز تصویریں، گالی گلوچ اور نفرت پھیلانے والے ویڈیوز کو سوشل میڈیا پر مزید پھیلا سکتے ہیں۔" حکم نامے میں یہ بھی کہا گیا ہے کہ اگر کوئی شخص اس حکم کی خلاف ورزی کرتا پایا گیا تو اس کے خلاف قانونی کارروائی کی جائے گی۔ (بشکریہ نیوز پورٹل ’آج تک‘)