Dous novos xogadores chegan á disciplina do Pontevedra CF. Ambos reforzarán a liña defensiva do conxunto granate no seu regreso á Primeira RFEF. Trátase do lateral esquerdo Adrián Expósito, procedente do Rayo Majadahonda; e do central Juan Ramón Gómez-Pimpollo López "Juanra", que chega do Atlético Baleares. Expósito, que ten 23 anos -cumprirá 24 en setembro-, xogou 38 partidos a pasada campaña co Rayo Majadahonda, club que militou na Segunda RFEF. Anteriormente, o lateral madrileño xogou no Estepona, o Navalcarnero e na canteira do Atlético de Madrid, coa que disputou a UEFA Youth League, a competición máis importante a nivel clubs en categoría xuvenil. Adrián Expósito, na súa etapa no Rayo MajadahondaRayo Majadahonda "Juanra", pola súa banda, ten 30 anos e xogou 56 partidos co Atlético Baleares nas dúas últimas campañas, unha delas na Primeira RFEF. O cidaderealeño ten ás súas costas unha sólida traxectoria con 80 partidos disputados na categoría de bronce. Pasou por equipos como San Sebastián de los Reyes, Talavera, Real Murcia ou Albacete, co que chegou a disputar varios partidos en Segunda División. Estes dúas novas fichaxes do Pontevedra súmanse aos do centrocampista Alain Ribeiro, o porteiro Raúl Marqueta e o lateral Víctor Eimil.