අඟහරු ග්‍රහයා මත ගමන් කරන NASA ආයතනයේ Perseverance රෝවරය, පෘථිවියෙන් පිටත සෞරග්‍රහ මණ්ඩලයේ වෙනත් යානාවන්ට වඩා වැඩි දුරක් ගමන් කරමින් නව වාර්තාවක් පිහිටුවා තිබේ.ඉරිදා වන විට එම රෝවරය අඟහරු මත ගමන් කර ඇති මුළු දුර සැතපුම් 28.06 ඉක්මවා ගොස් ඇත. එය කිලෝමීටර් 45.2කට ආසන්න දුරකි. 2021 පෙබරවාරි මාසයේදී අඟහරු ග්‍රහයා මත ගොඩබැසීමෙන් පසු Jezero ආවාටය තුළ සහ ඒ අවට ප්‍රදේශවල ගමන් කරමින් එම දුර සම්පූර්ණ කර තිබේ.ඒ අනුව, 2004 වසරේ සිට 2018 වසරේදී ක්‍රියාකාරිත්වය නතර වන තෙක් අඟහරු මත ගමන් කළ NASA හි තවත් කුඩා රෝවරයක් වන Opportunity තැබූ වාර්තාව Perseverance විසින් අභිබවා ගොස් ඇත.මෙහෙයුම මෙහෙයවන NASA හි Jet Propulsion Laboratory ආයතනය සඳුදා මේ බව නිවේදනය කළේ රෝවරයේ පිහිටීම සහ ගමන් කළ මුළු දුර තහවුරු කිරීමෙන් අනතුරුවය. ඒ වන විට රෝවරය ගමන් කර තිබූ දුර සැතපුම් 28.1ක් හෙවත් කිලෝමීටර් 45.2ක් ලෙස සටහන් විය.මෙම සන්ධිස්ථානය අගෝස්තු මාසයේදී පසුකරනු ඇතැයි මෙහෙයුම් කළමනාකරුවන් මුලින් අපේක්ෂා කළ ද, අඟහරු මත මෙතෙක් අධ්‍යයනය කළ පැරණිතම පාෂාණ අතරට අයත් විය හැකි ලා පැහැති පාෂාණ කිහිපයක් හමුවීම නිසා රෝවරයේ ගමන ප්‍රමාද විය. ඒවා අධ්‍යයනය කිරීම සඳහා රෝවරය මාස දෙකක පමණ කාලයක් එම ප්‍රදේශයේ රැඳී සිටියේය.“එම රෝවරය අඟහරු මතුපිටට යවා තිබෙන්නේ විද්‍යාත්මක පර්යේෂණ සඳහායි. ගමන් දුර පිළිබඳ වාර්තාව ලබාගැනීමට අප සතුටු වෙනවා. නමුත් ඒ අතරතුර මෙහෙයුම ඉදිරියට ගෙන යන්නේ පාෂාණ පිළිබඳ අධ්‍යයනයයි” යනුවෙන් ව්‍යාපෘතියේ ප්‍රධාන විද්‍යාඥ Katie Stack Morgan ඔක්තෝබර් මස මුලදී පැවති සම්මුඛ සාකච්ඡාවකදී ප්‍රකාශ කර තිබේ.ඉදිරි වසර කිහිපය තුළ Perseverance රෝවරයට තවත් කිලෝමීටර් ගණනාවක් ගමන් කිරීමට හැකි වනු ඇතැයි අපේක්ෂා කෙරේ.The post අඟහරු ග්‍රහයා මත වැඩිම දුරක් ගමන් කළ රෝවරය ලෙස NASA හි Perseverance වාර්තාවක් පිහිටුවයි appeared first on Siyatha News.