دہلی کے جنتر منتر اور دہلی سے باہر جولائی 2026 میں پیش آئے تشدد کے واقعات کی تحقیقات کے لیے سپریم کورٹ کی جانب سے تشکیل دی گئی اعلیٰ اختیار یافتہ تحقیقاتی کمیٹی (ایچ پی ای سی) نے ایک پورٹل شروع کیا ہے۔ اس پورٹل کا مقصد تشدد سے متاثرہ افراد، جن میں متاثرہ پولیس اہلکار بھی شامل ہیں، کی شکایات درج کرنا اور ان سے متعلقہ معلومات حاصل کرنا ہے۔ کمیٹی نے متاثرین اور دیگر متعلقہ فریقوں سے اپیل کی ہے کہ وہ پورٹل کے ذریعہ اپنی شکایات، نمائندگی اور متعلقہ دستاویزات مقررہ طریقے سے جمع کرائیں۔سپریم کورٹ کے 18 اگست 2026 اور 10 ستمبر 2026 کے احکامات میں دی گئی ہدایات کے مطابق اعلیٰ اختیار یافتہ تحقیقاتی کمیٹی تشدد کے تمام پہلوؤں کی جانچ کرے گی۔ تحقیقات کے دوران پیلیٹ گن کے استعمال، خواتین مظاہرین کو نشانہ بنانے اور انہیں ہراساں کیے جانے سے متعلق معاملات کو ترجیح دی جائے گی۔ اس کے علاوہ تشدد کے دوران دونوں فریقوں کی جانب سے حد سے زیادہ طاقت کے استعمال اور سرکاری و نجی املاک کو نقصان پہنچانے کے واقعات کی بھی تحقیقات کی جائیں گی۔کمیٹی کی جانب سے پورٹل شروع کرنے کا مقصد متاثرہ افراد کو اپنی شکایات اور واقعات سے متعلق معلومات پیش کرنے کے لیے ایک باضابطہ پلیٹ فارم فراہم کرنا ہے، تاکہ تشدد کے مختلف پہلوؤں کی جانچ کے دوران متعلقہ حقائق اور شواہد کو سامنے لایا جا سکے۔ دی گئی جانکاری کے مطابق کمیٹی نے پورٹل پر حساس گواہوں کی حفاظت اور ان کی شناخت کو خفیہ رکھنے کے لیے خصوصی انتظامات کیے ہیں۔ اس کے تحت متاثرہ افراد اپنی شناخت ظاہر کیے بغیر بھی شکایات درج کرا سکتے ہیں اور اپنی نمائندگی پیش کر سکتے ہیں۔ اس سہولت کا مقصد ان افراد کو تحفظ فراہم کرنا ہے جو اپنی شناخت ظاہر کرنے کی وجہ سے کسی ممکنہ خطرے یا دباؤ کا اندیشہ رکھتے ہیں۔ایچ پی ای سی نے متاثرہ افراد اور دیگر متعلقہ فریقوں سے کہا ہے کہ وہ پورٹل پر فراہم کیے گئے مقررہ فارمیٹ کے مطابق اپنی شکایات اور متعلقہ دستاویزات اپلوڈ کریں۔ کمیٹی کا کہنا ہے کہ تحقیقات سے متعلق معاملات پر معلومات یا تجاویز پیش کرنے کے خواہش مند افراد بھی اس پورٹل کے ذریعہ اپنا تعاون دے سکتے ہیں۔ جو افراد اپنی شکایات، نمائندگی یا دیگر متعلقہ دستاویزات ذاتی طور پر جمع کرانا چاہتے ہیں، وہ کمیٹی کے دفتر میں یہ مواد جمع کرا سکتے ہیں۔ اس کے لیے مقرر کیا گیا پتہ ہے: شکشا سدن، 17، راؤز ایونیو انسٹی ٹیوشنل ایریا، نئی دہلی-110002۔ دفتر میں تمام کام کے دنوں میں دوپہر 2 بجے سے شام 4 بجے تک دستاویزات جمع کرائی جا سکتی ہیں۔ اس کے علاوہ متعلقہ مواد ڈاک کے ذریعہ بھی بھیجا جا سکتا ہے۔ کمیٹی نے شکایات اور دستاویزات ای میل کے ذریعہ بھیجنے کی سہولت فراہم کی ہے۔ اس کے لیے hpec2026.enquiry@nic.in پر رابطہ کیا جا سکتا ہے۔کمیٹی کی جانب سے جاری اس سہولت کے ذریعہ تشدد سے متاثرہ افراد کو اپنے ساتھ پیش آنے والے واقعات کی تفصیلات، شکایات اور متعلقہ شواہد تحقیقاتی عمل کا حصہ بنانے کا موقع ملے گا۔ سپریم کورٹ کی ہدایات کے تحت کمیٹی ان تمام پہلوؤں کی جانچ کرے گی جنہیں اس کی تحقیقات کے دائرے میں شامل کیا گیا ہے۔