ഗൾഫ് സഹകരണ കൗൺസിൽ (ജി.സി.സി) അംഗരാജ്യങ്ങൾ തമ്മിലുള്ള സാമ്പത്തിക, വ്യാപാര, ലോജിസ്റ്റിക് ബന്ധം കൂടുതൽ ശക്തിപ്പെടുത്താൻ ലക്ഷ്യമിട്ടുള്ള ഗൾഫ് റെയിൽ പദ്ധതിയുടെ നിർവഹണം വേഗത്തിലാക്കാൻ ജി.സി.സി ഗതാഗത മന്ത്രിമാരുടെ 29-ാമത് അസാധാരണ യോഗം നിർണായക തീരുമാനങ്ങൾ കൈക്കൊണ്ടു. സൗദി അറേബ്യയുടെ അധ്യക്ഷതയിൽ വീഡിയോ കോൺഫറൻസിലൂടെ ചേർന്ന യോഗത്തിൽ കുവൈത്തിനെ പൊതുമരാമത്ത് മന്ത്രി ഡോ. നൂറ അൽ-മഷാൻ പ്രതിനിധീകരിച്ചു.ഗൾഫ് മേഖലയിലെ ഏറ്റവും പ്രധാനപ്പെട്ട തന്ത്രപ്രധാന അടിസ്ഥാനസൗകര്യ പദ്ധതികളിലൊന്നായ ഗൾഫ് റെയിൽ പദ്ധതി അംഗരാജ്യങ്ങൾ തമ്മിലുള്ള സാമ്പത്തിക ഏകീകരണത്തിനും വ്യാപാര വളർച്ചയ്ക്കും ലോജിസ്റ്റിക് മേഖലയിലെ വികസനത്തിനും പുതിയ കരുത്തേകുമെന്ന് യോഗം വിലയിരുത്തി. പദ്ധതി യാഥാർഥ്യമാകുന്നതോടെ ഗൾഫ് രാജ്യങ്ങളും പ്രാദേശിക, അന്തർദേശീയ വിപണികളും തമ്മിലുള്ള ബന്ധം കൂടുതൽ ശക്തമാകുമെന്നും ഡോ. നൂറ അൽ-മഷാൻ പറഞ്ഞു.ALSO READ: ആഗോള സാമ്പത്തിക വികസന ചർച്ചകളിൽ പങ്കാളിയാകാൻ അദീബ് അഹമ്മദ്; ഡബ്ല്യു.എസ്.ജെ സി.ഇ.ഒ കൗൺസിലിലേക്ക് ക്ഷണംകഴിഞ്ഞ ഏപ്രിൽ 28-ന് ജിദ്ദയിൽ ചേർന്ന ജി.സി.സി നേതാക്കളുടെ 19-ാമത് കൂടിയാലോചനാ യോഗത്തിൽ കൈക്കൊണ്ട തീരുമാനങ്ങളുടെ തുടർച്ചയായാണ് മന്ത്രിതല യോഗം ചേർന്നത്. അംഗരാജ്യങ്ങൾ തമ്മിലുള്ള ലോജിസ്റ്റിക് ഏകോപനം ശക്തിപ്പെടുത്തുന്നതിനും ഗൾഫ് റെയിൽ പദ്ധതിയുടെ നിർവഹണം ത്വരിതപ്പെടുത്തുന്നതിനുമായി സ്വീകരിച്ച നടപടികളും പുരോഗതിയും യോഗം വിശദമായി വിലയിരുത്തി.ഗൾഫ് റെയിൽ പദ്ധതിയെ മേഖലയിലെ ഏറ്റവും പ്രധാനപ്പെട്ട സംയുക്ത വികസന പദ്ധതികളിലൊന്നായി വിശേഷിപ്പിച്ച മന്ത്രിമാർ, പദ്ധതി പൂർത്തിയാകുന്നതോടെ ട്രക്കുകൾ വഴിയുള്ള ചരക്കുനീക്കത്തെ ആശ്രയിക്കുന്നത് ഗണ്യമായി കുറയുമെന്നും, ചരക്കുകളും ഉൽപ്പന്നങ്ങളും അംഗരാജ്യങ്ങൾക്കിടയിൽ കൂടുതൽ വേഗത്തിലും സുരക്ഷിതമായും ചെലവുകുറഞ്ഞും എത്തിക്കാനാകുമെന്നും ചൂണ്ടിക്കാട്ടി. ഇതിലൂടെ വ്യാപാര കൈമാറ്റം വർധിക്കുന്നതിനൊപ്പം ഗൾഫ് മേഖലയെ ആഗോള ലോജിസ്റ്റിക് ശൃംഖലയുമായി കൂടുതൽ ഫലപ്രദമായി ബന്ധിപ്പിക്കാനാകുമെന്നും അവർ വ്യക്തമാക്കി.ഗൾഫ് റെയിൽ പദ്ധതിയുടെ നിർവഹണം വേഗത്തിലാക്കുന്നതിനായി സമഗ്രമായ പഠനങ്ങളും സാങ്കേതിക ഏകോപനവും കൂടുതൽ ശക്തിപ്പെടുത്താനും ബന്ധപ്പെട്ട ഏജൻസികൾ തമ്മിലുള്ള സഹകരണം വിപുലീകരിക്കാനും യോഗം തീരുമാനിച്ചു. ഗൾഫ് രാജ്യങ്ങളുടെ സംയുക്ത വികസനത്തിനും സാമ്പത്തിക വൈവിധ്യവൽക്കരണത്തിനും ഭാവിയിലെ ഗതാഗത-ലോജിസ്റ്റിക് രംഗത്തെ വളർച്ചയ്ക്കും ഗൾഫ് റെയിൽ പദ്ധതി നിർണായക നാഴികക്കല്ലാകുമെന്നാണ് മന്ത്രിമാർ വിലയിരുത്തിയത്.The post സാമ്പത്തിക ഏകീകരണത്തിന് പുതിയ കരുത്തേകാൻ ഗൾഫ് റെയിൽ; ജി.സി.സി മന്ത്രിതല യോഗം ചേർന്നു appeared first on Kairali News | Kairali News Live.