ملک بھر میں موسم کا مزاج مسلسل بدل رہا ہے۔ قومی راجدھانی دہلی اور این سی آر میں کچھ دنوں قبل شدید گرمی تھی، اور اب اچانک آندھی و بارش جیسا موسم دیکھنے کو مل رہا ہے۔ محکمۂ موسمیات (آئی ایم ڈی) کے مطابق منگل کے روز دہلی کا کم از کم درجۂ حرارت 27 ڈگری سیلسیس اور زیادہ سے زیادہ 38 ڈگری سیلسیس رہنے کا امکان ہے۔ دن بھر آسمان پر بادل چھائے رہ سکتے ہیں اور گرج چمک کے ساتھ ہلکی بارش ہونے کی بھی توقع ہے۔اس دوران جنوب مغربی مانسون نے بھی رفتار پکڑ لی ہے۔ محکمۂ موسمیات کے مطابق 16 جون کو مانسون آندھرا پردیش، مغربی بنگال، اوڈیشہ، جھارکھنڈ اور بہار کے مزید کچھ علاقوں تک پہنچ سکتا ہے۔ آئندہ 4 سے 5 دنوں کے دوران مہاراشٹر، کرناٹک اور چھتیس گڑھ کے بعض علاقوں میں بھی مانسون دستک دے سکتا ہے۔16 سے 21 جون کے درمیان ہماچل پردیش، اتراکھنڈ، پنجاب، ہریانہ، دہلی اور اتر پردیش کے کئی حصوں میں بارش کا امکان ہے۔ ہریانہ اور راجستھان کے بعض مقامات پر 60 سے 80 کلومیٹر فی گھنٹہ کی رفتار سے تیز آندھی چلنے کی پیش گوئی کی گئی ہے۔ اسی طرح جموں و کشمیر، ہماچل پردیش اور اتراکھنڈ کے کچھ علاقوں میں آسمانی بجلی گرنے اور تیز ہواؤں کا بھی الرٹ جاری کیا گیا ہے۔ 18 اور 19 جون کو جموں و کشمیر اور ہماچل پردیش کے پہاڑی علاقوں میں برف باری کا اندیشہ ظاہر کیا گیا ہے۔دوسری طرف 16 سے 20 جون تک راجستھان کے ریگستانی اضلاع جیسلمیر، سری گنگا نگر اور بیکانیر میں آندھی و بارش کا الرٹ جاری کیا گیا ہے۔ اس کے ساتھ ہی جے پور، ادے پور، جودھ پور، بھیلواڑہ سمیت دیگر اضلاع میں بھی بارش جیسا موسم برقرار رہنے کا امکان ہے۔ چھتیس گڑھ اور مغربی مدھیہ پردیش میں 21 جون تک متعدد مقامات پر بارش ہونے کی توقع ہے۔ ان علاقوں میں گرج چمک کے ساتھ 40 سے 60 کلومیٹر فی گھنٹہ کی رفتار سے تیز ہوائیں چل سکتی ہیں۔ مشرقی ہندوستان میں بہار، جھارکھنڈ، اڈیشہ، مغربی بنگال اور سکم میں بارش کا امکان ہے۔ مغربی بنگال اور سکم میں 17 سے 20 جون کے درمیان بعض مقامات پر انتہائی شدید بارش ہو سکتی ہے، جبکہ بہار اور اڈیشہ کے کچھ حصوں میں موسلادھار بارش اور تیز آندھی کی وارننگ جاری کی گئی ہے۔محکمۂ موسمیات نے اروناچل پردیش، آسام اور میگھالیہ میں 18 سے 21 جون کے دوران انتہائی شدید بارش کا امکان ظاہر کیا ہے۔ جنوبی ہندوستان میں کیرلم، کرناٹک، تمل ناڈو، آندھرا پردیش اور تلنگانہ میں بھی بارش کی سرگرمیاں جاری رہیں گی۔ کیرلم اور تمل ناڈو کے بعض علاقوں میں شدید بارش ہو سکتی ہے، جبکہ تلنگانہ کے کچھ حصوں میں لو چلنے کا امکان برقرار ہے۔گوا، وسطی مہاراشٹر، مراٹھواڑہ اور اڈیشہ میں 17 جون تک گرم اور مرطوب موسم کے باعث لوگوں کو پریشانی کا سامنا کرنا پڑ سکتا ہے۔ محکمۂ موسمیات کے مطابق 18 جون تک شمال مغربی ہندوستان میں زیادہ سے زیادہ درجۂ حرارت میں 2 سے 4 ڈگری سیلسیس تک اضافہ ہو سکتا ہے، جبکہ ملک کے دیگر حصوں میں درجۂ حرارت میں کسی بڑی تبدیلی کا امکان نہیں ہے۔