భారతీయ సంగీత ప్రపంచంలో ఒక సువర్ణ అధ్యాయం ముగిసింది. దశాబ్దాల పాటు తన అమృత గాత్రంతో కోట్లాది మందిని అలరించిన ‘దక్షిణ భారత కోకిల’ ఎస్. జానకి (88) శనివారం కన్నుమూశారు. గత కొంతకాలంగా వయోభారంతో కూడిన అనారోగ్య సమస్యలతో బాధపడుతున్న ఆమె మైసూర్ లోని అపోలో ఆసుపత్రిలో చికిత్స పొందుతూ గుండెపోటు కారణంగా తుదిశ్వాస విడిచారు. ఆమె మరణవార్త విన్న సినీ లోకం దిగ్భ్రాంతికి గురైంది. భారతీయ చిత్రసీమ, ముఖ్యంగా దక్షిణాది సినీ పరిశ్రమ ఒక కన్నతల్లిని కోల్పోయినంతగా శోకసంద్రంలో మునిగిపోయింది.ఆరు దశాబ్దాల ప్రస్థానం 1957లో ఒక తమిళ చిత్రం ద్వారా గాయనిగా వెండితెరకు పరిచయమైన జానకి ఆ తర్వాత వెనక్కి తిరిగి చూసుకోలేదు. దాదాపు 60 ఏళ్లకు పైగా సాగిన ఆమె సంగీత ప్రస్థానంలో తెలుగు, తమిళం, కన్నడ, మలయాళం, హిందీతో పాటు సుమారు 17 భాషల్లో 48వేల పైగా పాటలను ఆలపించి రికార్డు సృష్టించారు. భాష ఏదైనా, భావాన్ని పలికించడంలో ఆమె శైలి అనన్య సామాన్యం. ముఖ్యంగా తెలుగు, కన్నడ, మలయాళ భాషల్లో ఆమె పాడిన పాటలు శ్రోతలను ఎంతగానో ఉర్రూతలూగించాయి. చిన్న పిల్లల గొంతు దగ్గర నుంచి వృద్ధుల గొంతు వరకు ఎలాంటి శబ్దాలనైనా అలవోకగా పలికించగల అద్భుత స్వర విన్యాసం ఆమె సొంతం. ఆల్-టైమ్ సూపర్ హిట్ కాంబినేషన్భారతీయ సినీ సంగీత చరిత్రలో ‘ఎస్పీ బాలసుబ్రహ్మణ్యం - ఇళయరాజా - ఎస్. జానకి’ కాంబినేషన్ ఒక సంచలనం. ఈ ముగ్గురి కలయికలో వచ్చిన పాటలు దక్షిణాది ఇండస్ట్రీలో ఎప్పటికీ నిలిచిపోయే క్లాసిక్స్‌గా మారాయి. ఎస్పీబీతో కలిసి జానకి గారు పాడిన వేలాది యుగళ గీతాలు ప్రేమికులకు అమృతకావ్యాలుగా నిలిచాయి. ఇళయరాజా స్వరకల్పనలో ఆమె పాడిన మెలోడీలు సంగీత ప్రియుల గుండెల్లో శాశ్వత స్థానాన్ని సంపాదించుకున్నాయి. ఆమె అద్భుత గాత్రానికి పురస్కారాలు దాసోహమన్నాయి. ఉత్తమ గాయనిగా 4 సార్లు జాతీయ అవార్డులను దక్కించుకున్న జానకి, వివిధ రాష్ట్ర ప్రభుత్వాల నుంచి ఏకంగా 31 సార్లు ఉత్తమ గాయనిగా అవార్డులు అందుకొని రికార్డు సృష్టించారు. వ్యక్తిగత జీవితంలో తీరని లోటుసంగీత ప్రపంచంలో ఎన్నో శిఖరాలను అధిరోహించిన జానకి వ్యక్తిగత జీవితంలో కొన్ని తీవ్ర విషాదాలు ఉన్నాయి. 1997లో ఆమె భర్త వి. రామ్‌ప్రసాద్ గుండెపోటుతో కన్నుమూశారు. ఈ ఏడాది జనవరిలోనే ఆమె ఏకైక కుమారుడు మురళీకృష్ణ కూడా తుదిశ్వాస విడిచారు. కొడుకు మరణించిన కొద్ది నెలలకే జానకి కూడా అనంత లోకాలకు తరలిపోవడం అభిమానుల గుండెలను పిండేస్తోంది. ఆమె భౌతికంగా మన మధ్య లేకపోయినా, ఆమె పాడిన వేలాది పాటల రూపంలో జానకి గారి స్వరం ప్రతి ఒక్కరి గుండెల్లో మారుమోగుతూనే ఉంటుంది. జానకి మరణవార్త తెలియగానే ఆమె ఆత్మకు శాంతి చేకూరాలని కోరుకుంటూ సినీ ప్రముఖులు, అభిమానులు సంతాపం వ్యక్తం చేస్తున్నారు.