Sugar Price Drop : ਤਿਉਹਾਰਾਂ ਤੋਂ ਪਹਿਲਾਂ ਚੀਨੀ ਸਸਤੀ ਹੋ ਰਹੀ ਹੈ, ਜਿਸ ਨਾਲ ਖਪਤਕਾਰਾਂ ਨੇ ਰਾਹਤ ਦਾ ਸਾਹ ਲਿਆ ਹੈ। ਦੇਸ਼ ਦੇ ਕਈ ਵੱਡੇ ਸ਼ਹਿਰਾਂ ਵਿੱਚ 22 ਅਗਸਤ ਦੇ ਮੁਕਾਬਲੇ 12 ਸਤੰਬਰ ਨੂੰ ਚੀਨੀ ਦੀਆਂ ਕੀਮਤਾਂ ਵਿੱਚ 12 ਰੁਪਏ ਤੋਂ ਲੈ ਕੇ 16 ਰੁਪਏ ਪ੍ਰਤੀ ਕਿਲੋ ਤੱਕ ਦੀ ਕਮੀ ਆਈ ਹੈ। ਯਾਨੀ ਅਗਸਤ ਮਹੀਨੇ ਵਿੱਚ ਜੋ ਚੀਨੀ 70 ਰੁਪਏ ਪ੍ਰਤੀ ਕਿਲੋ ਤੱਕ ਪਹੁੰਚ ਗਈ ਸੀ, ਉਸ ਵਿੱਚ ਹੁਣ ਤੇਜ਼ੀ ਨਾਲ ਗਿਰਾਵਟ ਦਰਜ ਕੀਤੀ ਜਾ ਰਹੀ ਹੈ। ਕਿਹੜੇ-ਕਿਹੜੇ ਸ਼ਹਿਰਾਂ ਵਿੱਚ ਘਟੀ ਕੀਮਤ? ਕਾਨਪੁਰ : ਇਨ੍ਹਾਂ 22 ਦਿਨਾਂ ਵਿੱਚ ਕਾਨਪੁਰ ਵਿੱਚ ਚੀਨੀ ਦੀ ਕੀਮਤ 69 ਰੁਪਏ ਤੋਂ ਘਟ ਕੇ 53 ਰੁਪਏ ਪ੍ਰਤੀ ਕਿਲੋ ਹੋ ਗਈ ਹੈ। ਯਾਨੀ ਸਿੱਧੇ ਤੌਰ ’ਤੇ 16 ਰੁਪਏ ਦੀ ਕਮੀ ਆਈ ਹੈ। ਰਾਂਚੀ 'ਚ 22 ਅਗਸਤ ਦੇ ਆਸ-ਪਾਸ ਚੀਨੀ ਦੀ ਕੀਮਤ ਲਗਭਗ 70 ਰੁਪਏ ਪ੍ਰਤੀ ਕਿਲੋ ਸੀ, ਜੋ ਹੁਣ ਘਟ ਕੇ 55 ਰੁਪਏ ਪ੍ਰਤੀ ਕਿਲੋ ਰਹਿ ਗਈ ਹੈ। ਕੋਲਕਾਤਾ ਅਤੇ ਗੁਵਾਹਾਟੀ ,ਇਨ੍ਹਾਂ ਦੋਵਾਂ ਸ਼ਹਿਰਾਂ ਵਿੱਚ ਵੀ 22 ਅਗਸਤ ਦੇ ਮੁਕਾਬਲੇ ਚੀਨੀ ਦੀ ਕੀਮਤ ਵਿੱਚ 15 ਰੁਪਏ ਪ੍ਰਤੀ ਕਿਲੋ ਤੱਕ ਦੀ ਗਿਰਾਵਟ ਆਈ ਹੈ।ਅਚਾਨਕ ਕਿਉਂ ਸਸਤੀ ਹੋ ਰਹੀ ਹੈ ਚੀਨੀ?ਸਰਕਾਰ ਨੇ ਚੀਨੀ ਮਿੱਲਾਂ ਲਈ ਸਟਾਕ ਲਿਮਿਟ ਘਟਾ ਦਿੱਤੀ ਹੈ। ਸਰਕਾਰ ਨੇ ਚੀਨੀ ਡੀਲਰਾਂ ਲਈ ਵੱਧ ਤੋਂ ਵੱਧ ਸਟਾਕ ਰੱਖਣ ਦੀ ਹੱਦ ਪਹਿਲਾਂ ਦੇ 4,000 ਕੁਇੰਟਲ ਤੋਂ ਘਟਾ ਕੇ ਸਿੱਧੀ 2,000 ਕੁਇੰਟਲ ਕਰ ਦਿੱਤੀ ਹੈ ਅਤੇ ਇਸ ਸਟਾਕ ਨੂੰ ਵੇਚਣ ਲਈ ਵੱਧ ਤੋਂ ਵੱਧ 30 ਦਿਨਾਂ ਦਾ ਸਮਾਂ ਦਿੱਤਾ ਹੈ।ਸਰਕਾਰ ਦੇ ਨਵੇਂ ਸੋਧੇ ਨਿਯਮਾਂ ਤਹਿਤ ਹੁਣ ਕੋਈ ਵੀ ਡੀਲਰ ਜਾਂ ਵਪਾਰੀ ਜਿਸ ਤਾਰੀਖ ਨੂੰ ਚੀਨੀ ਮਿੱਲ ਤੋਂ ਸਟਾਕ ਪ੍ਰਾਪਤ ਕਰੇਗਾ, ਉਸ ਨੂੰ 30 ਦਿਨਾਂ ਦੇ ਅੰਦਰ ਹਰ ਹਾਲ ਵਿੱਚ ਬਾਜ਼ਾਰ ਵਿੱਚ ਵੇਚਣਾ ਹੋਵੇਗਾ। ਉਹ 30 ਦਿਨਾਂ ਤੋਂ ਵੱਧ ਸਮੇਂ ਤੱਕ ਚੀਨੀ ਨੂੰ ਗੋਦਾਮ ਵਿੱਚ ਰੱਖ ਕੇ ਨਹੀਂ ਬੈਠ ਸਕਦਾ।ਇਸੇ ਤਰ੍ਹਾਂ ਸਰਕਾਰ ਨੇ ਥੋਕ ਖਪਤਕਾਰਾਂ ਲਈ 15 ਦਿਨਾਂ ਦੇ ਅੰਦਰ ਸਟਾਕ ਘਟਾਉਣ ਜਾਂ ਸਿਰਫ਼ 15 ਦਿਨਾਂ ਦੀ ਖਪਤ ਦੇ ਬਰਾਬਰ ਸਟਾਕ ਰੱਖਣ ਦਾ ਨਿਯਮ ਲਾਗੂ ਕੀਤਾ ਹੈ। ਯਾਨੀ ਇਹ ਆਪਣੇ ਕੋਲ ਸਿਰਫ਼ 15 ਦਿਨਾਂ ਦੀ ਖਪਤ ਦੇ ਬਰਾਬਰ ਚੀਨੀ ਰੱਖ ਸਕਦੇ ਹਨ। ਵਾਧੂ ਚੀਨੀ ਨੂੰ ਬਾਜ਼ਾਰ ਵਿੱਚ ਵੇਚਣ ਲਈ ਉਤਾਰਨਾ ਹੋਵੇਗਾ। ਕਿਉਂਕਿ ਨਿਯਮ ਲਾਗੂ ਹੋਣ ਦੀ ਆਖਰੀ ਤਾਰੀਖ ਨੇੜੇ ਆ ਰਹੀ ਹੈ, ਇਸ ਲਈ ਵਪਾਰੀ ਜਲਦਬਾਜ਼ੀ ਵਿੱਚ ਚੀਨੀ ਬਾਜ਼ਾਰ ਵਿੱਚ ਵੇਚ ਰਹੇ ਹਨ। ਇਸ ਕਾਰਨ ਕੀਮਤਾਂ ਤੇਜ਼ੀ ਨਾਲ ਹੇਠਾਂ ਆ ਰਹੀਆਂ ਹਨ।ਇਸ ਤੋਂ ਇਲਾਵਾ ਸਰਕਾਰ ਨੇ 587 ਮਿੱਲਾਂ ਅਤੇ ਦੋ ਰਿਫਾਈਨਰੀਆਂ ਲਈ 13 ਲੱਖ ਟਨ ਚੀਨੀ ਦਾ ਕੋਟਾ ਵੀ ਤੈਅ ਕੀਤਾ ਹੈ। ਇਸ ਦੇ ਤਹਿਤ ਮਿੱਲਾਂ ਨੂੰ ਹਰ ਹਾਲ ਵਿੱਚ 15 ਦਿਨਾਂ ਦੇ ਅੰਦਰ ਇਹ 13 ਲੱਖ ਟਨ ਚੀਨੀ ਬਾਜ਼ਾਰ ਵਿੱਚ ਉਤਾਰਨੀ ਹੋਵੇਗੀ। ਇਸ ਕਾਰਨ ਮਿੱਲਾਂ ਤੋਂ ਚੀਨੀ ਦੀ ਥੋਕ ਸਪਲਾਈ ਅਚਾਨਕ ਵਧ ਗਈ ਹੈ। ਵਪਾਰੀਆਂ ਦੀ ਸਟਾਕ ਲਿਮਿਟ ਅੱਧੀ ਕਰਨ ਦੇ ਫੈਸਲੇ ਅਤੇ ਇਸ ਵੱਡੇ ਕੋਟੇ ਦੇ ਇਕੱਠੇ ਲਾਗੂ ਹੋਣ ਕਾਰਨ ਹੀ ਚੀਨੀ ਦੀਆਂ ਕੀਮਤਾਂ ਵਿੱਚ 12 ਤੋਂ 16 ਰੁਪਏ ਪ੍ਰਤੀ ਕਿਲੋ ਤੱਕ ਦੀ ਵੱਡੀ ਗਿਰਾਵਟ ਦੇਖਣ ਨੂੰ ਮਿਲੀ ਹੈ।