ప్రస్తుత కాలంలో భార్యాభర్తల మధ్య చిన్నచిన్న మనస్పర్థలు, అనుమానాలు, అపోహలు తీవ్ర విషాదాలకు దారితీస్తున్న ఘటనలు తరచూ వెలుగులోకి వస్తున్నాయి. భార్యాభర్తల మధ్య పరస్పర నమ్మకం దెబ్బతింటే కుటుంబ బంధాలు ఎంత దారుణంగా ముగుస్తాయో మరోసారి హైదరాబాద్‌లోని ఉప్పల్‌లో జరిగిన ఘటన నిరూపించింది. భార్యపై అనుమానం పెంచుకున్న ఓ భర్త.. చివరికి ఆమెనే కడతేర్చి ఓ చిన్నారి జీవితాన్ని అనాథగా మార్చిన విషాద సంఘటన స్థానికంగా కలకలం రేపింది.పోలీసులు వెల్లడించిన వివరాల ప్రకారం.. ఉప్పల్ పోలీస్ స్టేషన్ పరిధిలోని చిలుకనగర్‌లో జెస్సికా, సురేష్ దంపతులు గత 4 ఏళ్లుగా నివాసం ఉంటున్నారు. వీరిద్దరూ ప్రైవేట్ కంపెనీల్లో ఉద్యోగాలు చేస్తూ.. జీవనం సాగిస్తున్నారు. 2015లో వీరికి వివాహం జరగ్గా.. వారికి 10 ఏళ్ల కుమార్తె కూడా ఉంది. బయటికి సాధారణ కుటుంబంలా కనిపించినా.. ఇంట్లో మాత్రం భార్యపై అనుమానంతో సురేష్ తరచూ గొడవలకు దిగేవాడని స్థానికులు చెబుతున్నారు.ఈ క్రమంలోనే శనివారం కూడా ఇదే విషయమై ఇద్దరి మధ్య తీవ్ర వాగ్వాదం జరిగింది. మాటామాటా పెరగడంతో కోపోద్రిక్తుడైన సురేష్.. భార్య జెస్సికాపై దాడి చేసి దారుణంగా హత్య చేసినట్లు పోలీసులు ప్రాథమికంగా నిర్ధారించారు. ఘటన అనంతరం సురేష్ స్వయంగా జెస్సికా అక్కకు ఫోన్ చేసి జరిగిన విషయం చెప్పడంతో కుటుంబ సభ్యులు దిగ్భ్రాంతికి గురయ్యారు. సమాచారం అందుకున్న ఉప్పల్ పోలీసులు వెంటనే ఘటనాస్థలానికి చేరుకుని మృతదేహాన్ని స్వాధీనం చేసుకున్నారు. అనంతరం పోస్టుమార్టం నిమిత్తం ఆస్పత్రికి తరలించి కేసు నమోదు చేశారు. నిందితుడిని అదుపులోకి తీసుకుని ఘటనకు దారితీసిన పూర్తి కారణాలపై విచారణ కొనసాగిస్తున్నారు. ఇటీవలి కాలంలో భార్యాభర్తల మధ్య అనుమానాలు, వివాహేతర సంబంధాల ఆరోపణలు, ఆర్థిక ఒత్తిళ్లు వంటి కారణాలతో కుటుంబాల్లో హింసాత్మక ఘటనలు పెరుగుతున్నాయి. చర్చల ద్వారా పరిష్కరించుకోవాల్సిన చిన్న విషయాల్లో కూడా ఆవేశానికి లోనై తీసుకునే నిర్ణయాలు కుటుంబాలను శాశ్వతంగా విచ్ఛిన్నం చేస్తున్నాయి. ఉప్పల్‌లో జరిగిన ఈ ఘటన కూడా అలాంటి విషాద సంఘటనల్లో మరోటిగా నిలిచింది. పోలీసులు అన్ని కోణాల్లో దర్యాప్తు కొనసాగిస్తూ పూర్తి వివరాలను సేకరిస్తున్నారు.