متحدہ عرب امارات میں ای اسکوٹر چلانے کے لیے عمر کی کم از کم حد مقرر کردی گئی ہے۔گلف نیوز کی رپورٹ کے مطابق متحدہ عرب امارات نے نئے ٹریفک ضوابط کے تحت یکم جنوری 2027 سے الیکٹرک اسکوٹر سواری کا اجازت نامہ حاصل کرنے کے لیے کم از کم عمر 15 سال مقرر کی ہے جس میں ذاتی نقل و حرکت کے آلات کے لیے پرمٹ، رجسٹریشن اور سخت حفاظتی معیارات بھی درکار ہیں۔یکم جنوری 2027 سے نئے انتظامی ضوابط سواروں کو موٹر گاڑیوں کے لیے مختص سڑکوں کے استعمال سے بھی منع کرتے ہیں انہیں حکام کے منظور کردہ راستوں تک محدود کرتے ہیں۔متحدہ عرب امارات کے ٹریفک اور روڈ قانون کے ضوابط عوامی سڑکوں پر ذاتی نقل و حرکت کے آلات کے استعمال کو کنٹرول کرنے کے لیے ایک جامع فریم ورک قائم کرتے ہیں، انہیں چھ زمروں میں درجہ بندی کرتے ہیں اور ان کے رجسٹریشن، اور مقررہ راستوں پر استعمال کے لیے قواعد وضع کرتے ہیں۔نئے ضوابط کے تحت الیکٹرک اسکوٹر، الیکٹرک بائیسکل اور چھوٹی موٹر سائیکلوں کے پرمٹ کے لیے درخواست دینے کے لیے سواروں کی عمر کم از کم 15 سال ہونی چاہیے، اجازت نامے تین سال کے لیے کارآمد ہوں گے اور ان کی تجدید کی جا سکتی ہے۔ضابطوں میں شامل چھ زمرے روایتی سائیکلیں، الیکٹرک سائیکلیں، الیکٹرک اسکوٹر، چھوٹی موٹر سائیکلیں، اسکیٹ بورڈز اور نقل و حرکت کے آلات ہیں جو بزرگ افراد اور معذور افراد کے لیے ڈیزائن کیے گئے ہیں۔