ചതുരംഗപ്പലകയിലെ 64 കളങ്ങളിൽ കരുക്കൾ നീക്കി ലോകത്തിന്റെ നെറുകയിൽ വീണ്ടും ഭാരതത്തിന്റെ കൊടിപാറിച്ച് ആർ. പ്രഗ്നാനന്ദ. ഗ്രാൻഡ് ചെസ് ടൂർ കിരീടം സ്വന്തമാക്കുന്ന ആദ്യ ഇന്ത്യൻ താരം എന്ന ചരിത്രനേട്ടം സ്വന്തമാക്കി പ്രഗ്നാനന്ദ വീണ്ടും രാജ്യത്തിന്റെ അഭിമാനമായി മാറിയിരിക്കുകയാണ്. സൂപ്പർ ഗ്രാന്റ്മാസ്റ്റർമാരുടെ അതിശക്തമായ നിരയെപ്പോലും തന്റെ പക്വതയാർന്ന നീക്കങ്ങൾ കൊണ്ട് നിഷ്പ്രഭമാക്കിക്കൊണ്ടായിരുന്നു ഈ 21-കാരന്റെ മുന്നേറ്റം.കളിക്കളത്തിലെ ശാന്തമായ പെരുമാറ്റവും എതിരാളിയുടെ ഏത് തന്ത്രത്തെയും നിമിഷനേരം കൊണ്ട് തകിടം മറിക്കാനുള്ള അപാരമായ ചിന്താശേഷിയുമാണ് പ്രഗ്നാനന്ദയെ എപ്പോഴും വ്യത്യസ്തനാക്കുന്നത്. ഗ്രാൻഡ് ചെസ് ടൂറിന്റെ ഓരോ ഘട്ടത്തിലും ലോകത്തിലെ ഏറ്റവും മികച്ച കളിക്കാർക്കെതിരെ പതറാതെ പോരാടിയ പ്രഗ്, ഇന്ത്യയുടെ ചെസ്സ് ചരിത്രത്തിലെ മറ്റൊരു സുവർണ്ണ അധ്യായമാണ് ഇവിടെ കൂട്ടിച്ചേർത്തത്. വിശ്വനാഥൻ ആനന്ദിന് ശേഷം ഇന്ത്യൻ ചെസ്സിനെ ലോകത്തിന്റെ ഏറ്റവും ഉയർന്ന തലത്തിൽ പ്രതിഷ്ഠിച്ച ആ മാന്ത്രിക വിരലുകൾക്ക് മുന്നിൽ എതിരാളികൾക്ക് ഉത്തരമില്ലായിരുന്നു.സെമിഫൈനലിൽ ജർമ്മനിയുടെ ശക്തനായ താരം വിൻസെന്റ് കെയ്മറെ തകർത്തുവിട്ടാണ് പ്രഗ്നാനന്ദ ഫൈനലിലേക്ക് യോഗ്യത നേടിയത്. ലണ്ടനിൽ നടന്ന ഗ്രാൻഡ് ചെസ് ടൂർ ഫൈനൽസിന്റെ കലാശപ്പോരാട്ടത്തിൽ ലോക രണ്ടാം നമ്പർ താരവും അമേരിക്കൻ ഇതിഹാസവുമായ ഫാബിയാനോ കരുവാനയായിരുന്നു പ്രഗ്ഗിന്റെ എതിരാളി.മത്സരത്തിന്റെ തുടക്കത്തിൽ കാര്യങ്ങൾ പ്രഗ്നാനന്ദയ്ക്ക് വലിയ വെല്ലുവിളിയായിരുന്നു. ക്ലാസിക്കൽ റൗണ്ടിലെ തോൽവിയോടെ പോയിന്റ് നിലയിൽ പിന്നിലായ പ്രഗ്നാനന്ദ കിരീടപോരാട്ടത്തിൽ നിന്ന് പുറത്തായി എന്ന് പലരും കരുതി. എന്നാൽ, കായികലോകത്തെ അതിശയിപ്പിച്ചുകൊണ്ട് റാപ്പിഡ്, ബ്ലിറ്റ്സ് റൗണ്ടുകളിൽ പ്രഗ് നടത്തിയ തിരിച്ചുവരവ് ചെസ്സ് ചരിത്രത്തിലെ തന്നെ ഏറ്റവും മികച്ച മാസ്സ് കംബാക്കുകളിൽ ഒന്നായിരുന്നു.റാപ്പിഡ് ഗെയിമുകളിൽ തുടർച്ചയായ വിജയങ്ങളോടെ തിരിച്ചടിച്ച പ്രഗ്നാനന്ദ, പോയിന്റ് നിലയിൽ മുന്നിലെത്തി. തുടർന്ന് നടന്ന വീറും വാശിയും നിറഞ്ഞ ബ്ലിറ്റ്സ് റൗണ്ടുകളിൽ റാഗോസിൻ പ്രതിരോധവും റോസോളിമോ സിസിലിയൻ ശൈലിയും പുറത്തെടുത്ത് പ്രഗ് കളി പൂർണ്ണമായി തന്റെ നിയന്ത്രണത്തിലാക്കി. സമ്മർദ്ദഘട്ടങ്ങളിൽ കരുവാന വരുത്തിയ പിഴവുകൾ കൃത്യമായി മുതലെടുത്ത പ്രഗ്നാനന്ദ, ഒടുവിൽ 15-13 എന്ന സ്കോറിനാണ് കിരീടം സ്വന്തമാക്കിയത്.