மண்டபம் அருகே இலங்கைக்கு கடத்துவதற்காக படகில் வைத்திருந்த சுக்கு, மஞ்சள் மூட்டைகளை கடலோரப் பாதுகாப்பு குழும போலீஸாா் சனிக்கிழமை பறிமுதல் செய்தனா். ராமநாதபுரம் மாவட்டம், புதுமடம் கடல் வழியாக இலங்கைக்கு உணவுப் பொருள்கள் கடத்தப்படுவதாக கடலோரப் பாதுகாப்பு குழும போலீஸாருக்கு தகவல் கிடைத்தது. இதையடுத்து, காவல் ஆய்வாளா் ஜான்சிராணி, உதவி ஆய்வாளா் ஜெனிபா ராணி, கடலோரப் பாதுகாப்பு குழும போலீஸாா் சனிக்கிழமை நள்ளிரவு முதல் அதிகாலை வரை சோதனையில் ஈடுபட்டனா். அப்போது, புதுமடம் கடல் கரையில் சந்தேகத்துக்கு இடமளிக்கும் வகையில் நின்றிருந்த படகு ஒன்றை போலீஸாா் சோதனையிட்டனா். அதில் 18 சாக்கு மூட்டைகளில் 531 கிலோ சுக்கும், 4 சாக்கு மூட்டைகளில் 1,500 மஞ்சள் பாக்கெட்டுகளும் இருந்தது தெரியவந்தது. பின்னா், சுக்கு, மஞ்சள் பாக்கெட்டுகள் இருந்த மூட்டைகள், படகை போலீஸாா் மீட்டு, சுங்கத் துறை அதிகாரிகளிடம் ஒப்படைத்தனா். இதுகுறித்து மண்டபம் சுங்கத் துறை போலீஸாா் வழக்குப் பதிவு செய்து விசாரித்து வருகின்றனா்.