ഇന്ത്യൻ വ്യോമയാന മേഖലയിൽ സുരക്ഷ ശക്തമാക്കുന്നതിന്റെ ഭാഗമായി രാജ്യത്തെ എല്ലാ എയർലൈൻ പൈലറ്റുമാർക്കും സൈക്കോ ആക്ടീവ് ലഹരി പരിശോധന നിർബന്ധമാക്കി ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ). കഴിഞ്ഞ മാസം എയർ ഇന്ത്യ വിമാനത്തിലെ ക്യാപ്റ്റൻ ലഹരി ഉപയോഗിച്ചതായി കണ്ടെത്തിയ സംഭവത്തെ തുടർന്നാണ് നടപടി.അടുത്ത വർഷം ജൂലൈ മാസത്തിനകം രാജ്യത്തെ മുഴുവൻ പൈലറ്റുമാരുടെയും പരിശോധന പൂർത്തിയാക്കണമെന്നാണ് ഡിജിസിഎയുടെ നിർദേശം. നിലവിൽ ഇന്ത്യൻ എയർലൈനുകളിലായി ഏകദേശം 14,000 പൈലറ്റുമാരാണ് ജോലി ചെയ്യുന്നത്.ഫുക്കറ്റ്-ഡൽഹി വിമാനവുമായി ബന്ധപ്പെട്ട സംഭവത്തിന് പിന്നാലെ എയർ ഇന്ത്യ ഗ്രൂപ്പ് സ്വമേധയാ മുന്നോട്ടുവന്ന് എയർ ഇന്ത്യയിലെയും എയർ ഇന്ത്യ എക്സ്പ്രസിലെയും ഏകദേശം 5,000 പൈലറ്റുമാരിൽ ഒറ്റത്തവണ റാൻഡം ഡ്രഗ് ടെസ്റ്റുകൾ ആരംഭിച്ചിരുന്നു. ഇതിന്റെ തുടർച്ചയായാണ് മറ്റ് എയർലൈനുകളിലെ മുഴുവൻ പൈലറ്റുമാരിലേക്കും പരിശോധന വ്യാപിപ്പിക്കാൻ ഡിജിസിഎ തീരുമാനിച്ചത്.വ്യോമയാന മേഖലയിലെ ജീവനക്കാരുടെ ലഹരി ഉപയോഗം കണ്ടെത്തുന്നതിനായി കൂടുതൽ ശക്തമായ നിയമങ്ങളുടെ കരട് ഈ മാസം അവസാനത്തോടെ പുറത്തിറക്കുമെന്ന് സിവിൽ ഏവിയേഷൻ മന്ത്രി കെ. രാംമോഹൻ നായിഡു നേരത്തെ വ്യക്തമാക്കിയിരുന്നു.നിലവിലെ ചട്ടപ്രകാരം ഒരു വർഷം ആകെ പൈലറ്റുമാരുടെ പത്ത് ശതമാനത്തിന് മാത്രമാണ് റാൻഡം പരിശോധന നടത്തിയിരുന്നത്. എന്നാൽ എല്ലാ പൈലറ്റുമാർക്കും വർഷത്തിൽ ഒരിക്കൽ ഡോപ്പ് ടെസ്റ്റ് നിർബന്ധമാക്കുന്ന തരത്തിൽ ചട്ടങ്ങൾ പരിഷ്കരിക്കാനുള്ള നടപടികളും അന്തിമഘട്ടത്തിലാണ്.പൈലറ്റുമാരുടെ ലഹരി ഉപയോഗം മൂലമുണ്ടാകാവുന്ന സുരക്ഷാ വീഴ്ചകൾ ഒഴിവാക്കുന്നതിനും യാത്രക്കാരുടെ സുരക്ഷ ഉറപ്പാക്കുന്നതിനുമുള്ള നിർണായക നടപടിയായാണ് ഡിജിസിഎയുടെ പുതിയ നിർദേശത്തെ വിലയിരുത്തുന്നത്.The post എല്ലാ പൈലറ്റുമാർക്കും ഡ്രഗ് ടെസ്റ്റ് നിർബന്ധം; വ്യോമയാന സുരക്ഷ ശക്തമാക്കി ഡിജിസിഎ appeared first on ഇവാർത്ത | Evartha.