وزیر خارجہ ایس جے شنکر نے گھانا کے فارن سروس انسٹی ٹیوٹ میں ایک خصوصی اجلاس سے خطاب کیا۔ انہوں نے کہا کہ ہندوستان افریقہ کو اپنے دل میں بسائے ہوئے ہے اور وہ ایسی شراکت داری قائم کرے گا، جو نہ صرف آج کے لیے، بلکہ آنے والی نسلوں کے لیے بھی ہوگی۔ یہاں ’افریقہ اور گلوبل ساؤتھ‘ کے موضوع پر ایک مذاکرے کا انعقاد کیا گیا تھا۔ بدلتے ہوئے عالمی ماحول پر بات کرتے ہوئے وزیر خارجہ جے شنکر نے کہا کہ آج کے ہنگامہ خیز دور میں سفارت کاری کے سامنے چیلنج یہ ہے کہ مسابقت کو تصادم میں بدلے بغیر اسے کیسے سنبھالا جائے اور مفادات کے مختلف ہونے کے باوجود تعاون کو کیسے فروغ دیا جائے۔جے شنکر نے ہندوستان کی امیدوں، کام کرنے کے طریقۂ کار اور خود اعتمادی کی کہانی پر روشنی ڈالی۔ انہوں نے بتایا کہ معیشت، بنیادی ڈھانچے، ڈیجیٹل، مینوفیکچرنگ، کاروبار اور لوگوں کی امیدوں میں ہونے والی تبدیلیاں ملک کو عالمی ترقی کا ایک اہم انجن بنا رہی ہیں۔ وزیر خارجہ نے کہا کہ قومی سلامتی کا تعلق سپلائی چین کی مضبوطی، تکنیکی صلاحیتوں اور ضروری اشیا تیار کرنے کی صلاحیت سے ہے۔ انہوں نے کہا کہ ہندوستان کئی شعبوں میں تعاون کو فروغ دینے کے ساتھ ساتھ اہم شعبوں میں خود کفالت کو بھی اہمیت دیتا ہے۔ وزیر خارجہ نے ہندوستان اور افریقہ کے لیے اپنی نوجوان آبادی کو پیداواری، ہنرمند اور بااختیار شہریوں میں تبدیل کرنے کی اہمیت پر زور دیا۔وزیر خارجہ ڈاکٹر ایس جے شنکر نے کہا کہ ہماری سائنسی اور تکنیکی طاقت مسلسل بڑھ رہی ہے، جو ہمارے وژن، عزم اور کم لاگت میں بہتر کام کرنے کی صلاحیت کی عکاسی کرتی ہے۔ ٹیکنالوجی کا فائدہ سب تک پہنچنا چاہیے۔ اس کے ساتھ ہی ایندھن، خوراک، کھاد اور فنانس جیسی سپلائی چین کو مضبوط کرنا بے حد ضروری ہے۔ انہوں نے کہا کہ گلوبل ساؤتھ کو صنعتی ترقی کا پورا حق حاصل ہے۔ اس بات پر زور دیتے ہوئے کہا کہ ہندوستان کی خارجہ پالیسی کا نقطۂ نظر اسٹریٹجک خود مختاری پر مبنی ہے۔ انہوں نے کہا کہ ہمارا ماننا ہے کہ شراکت داریوں سے ہمارے اختیارات بڑھنے چاہئیں، نہ کہ محدود ہونے چاہئیں۔گلوبل ساؤتھ کی آواز کو مضبوط بنانے کے عزم کا اعادہ کرتے ہوئے وزیر خارجہ نے کہا کہ یہ ہندوستان کی صدارت کے دوران جی20 میں افریقی یونین کو شامل کیے جانے سے ظاہر ہوا تھا۔ انہوں نے ایک بہتر عالمی نظام کے ہندوستانی وژن پر روشنی ڈالی، جو افریقہ اور گلوبل ساؤتھ کی ترقی، پیش رفت اور خوشحالی کی حمایت کرے۔ وزیر خارجہ جے شنکر نے افریقہ کے ساتھ ہندوستان کی مضبوط شراکت داری کو اجاگر کیا، جس میں تجارت، بنیادی ڈھانچہ، صلاحیت سازی، انسانی امداد اور ڈیزاسٹر ریلیف (ایچ اے ڈی آر)، زراعت، صحت اور صاف توانائی جیسے شعبے شامل ہیں۔ وزیر خارجہ نے کہا کہ بہتر صلاحیتوں والا ہندوستان زیادہ سنجیدہ اور مؤثر شراکت دار ہے۔ ہم افریقہ کو اپنے دل میں بسائے ہوئے ہیں اور ہم ایسی شراکت داری قائم کریں گے، جو نہ صرف آج کے لیے، بلکہ آنے والی نسلوں کے لیے بھی ہوگی۔ وزیر خارجہ جے شنکر نے گھانا میں ہندوستانی برادری اور ہندوستان کے دوستوں سے بھی بات چیت کی اور دونوں ممالک کے درمیان شراکت داری کو مضبوط بنانے کے لیے ان کی کوششوں کی تعریف کی۔ وزیر خارجہ جے شنکر نے گھانا کے وزیر خارجہ سیموئل اوکودجیٹو ابلاکوا اور وزیر تعلیم ہارونا اڈریسو کے ساتھ مل کر فرینجی پانی (پلمیریا) کا پودا لگایا۔ یہ ہندوستان کی ’ایک پیڑ ماں کے نام‘ اور گھانا کی ’ٹری فار لائف‘ مہم کے جذبے کی عکاسی کرتا ہے۔