دوران پرواز پاور بینک سے آگ لگنے کا ایک اور واقعہ سامنے آگیا۔دہلی سے چنئی جانے والی انڈیگو ایئرلائن کی پرواز میں اچانک پاور بینک میں آگ لگ گئی جس سے افراتفری پھیل گئی۔انڈیگو کی پرواز میں اس وقت ڈرامائی مناظر دیکھنے میں آئے جب مبینہ طور پر اوور ہیڈ سامان والے ڈبے کے اندر پاور بینک میں آگ لگ گئی، جس سے طیارے کو ہنگامی طور پر حیدرآباد کی طرف موڑنا پڑا۔ایک مسافر کی طرف سے ریکارڈ کی گئی ویڈیو میں شعلے اور نارنجی رنگ کی چمک اوور ہیڈ ڈبے میں پھیلتی ہوئی دکھائی دیتی ہے جب کہ خوف زدہ مسافر آگ پر قابو پانے کے لیے بھاگ رہے ہیں۔کئی مسافروں کو اپنے بیگوں سے جلتے ہوئے حصے پر بار بار ضرب لگا کر آگ بجھانے کی کوشش کرتے ہوئے دیکھا جا سکتا ہے۔اطلاعات کے مطابق، عملے کے ارکان نے بالآخر طیارے میں موجود آگ بجھانے والے آلات (فائر ایکسٹنگوشرز) کی مدد سے آگ پر قابو پا لیا۔طیارے کا رخ حیدرآباد کی جانب موڑ دیا گیا جہاں وہ بحفاظت اتر گیا۔ تمام مسافر اور عملے کے ارکان محفوظ بتائے گئے ہیں۔