തമിഴ്നാട് രാഷ്ട്രീയത്തിൽ കടുത്ത ഭരണമാറ്റത്തിന് പിന്നാലെ പ്രതിപക്ഷ കക്ഷിയായ എഐഎഡിഎംകെ.ക്കുള്ളിൽ വീണ്ടും നാടകീയമായ രാഷ്ട്രീയ അട്ടിമറിയും പിളർപ്പും. പാർട്ടിയിലെ മുതിർന്ന നേതാക്കളായ സി.വി. ഷൺമുഖം, എസ്പി വേലുമണി എന്നിവരുടെ നേതൃത്വത്തിലുള്ള വിമത ക്യാമ്പിലെ പ്രമുഖരായ മൂന്ന് എഐഎഡിഎംകെ എംഎൽഎമാർ തിങ്കളാഴ്ച തമിഴ്നാട് നിയമസഭാ സ്പീക്കർ ജെസിഡി പ്രഭാകറിനെ നേരിട്ട് കണ്ട് തങ്ങളുടെ രാജി സമർപ്പിച്ചു.ഇവർക്ക് പിന്നാലെ വിമത ക്യാമ്പിലുണ്ടായിരുന്ന മറ്റ് അഞ്ച് എംഎൽഎമാർ തങ്ങളുടെ മുൻ നിലപാടുകൾ തിരുത്തി പാർട്ടി അധ്യക്ഷൻ എടപ്പാടി കെ. പളനിസ്വാമിക്ക് വീണ്ടും പൂർണ്ണ പിന്തുണ പ്രഖ്യാപിച്ച് ഔദ്യോഗിക പക്ഷത്തേക്ക് മടങ്ങിയെത്തി.മധുരാന്തകം മണ്ഡലത്തിൽ നിന്നുള്ള മരഗതം കുമാരവേൽ, ധാരാപുരത്ത് നിന്നുള്ള പി. സത്യഭാമ, പെരുന്തുറൈ മണ്ഡലത്തെ പ്രതിനിധീകരിക്കുന്ന എസ്. ജയകുമാർ എന്നീ എഐഎഡിഎംകെ എംഎൽഎമാരാണ് ചെന്നൈ സെക്രട്ടേറിയറ്റിലെത്തി സ്പീക്കർക്ക് രാജി കൈമാറിയത്. എഐഎഡിഎംകെയുടെ പരമ്പരാഗത കടുത്ത കോട്ടയായ പടിഞ്ഞാറൻ തമിഴ്നാട്ടിലെ ‘കൊങ്കു’ മേഖലയിൽ ഉൾപ്പെടുന്ന മണ്ഡലങ്ങളാണ് ധാരാപുരവും പെരുന്തുറൈയും.രാജി സമർപ്പിച്ചതിന് തൊട്ടുപിന്നാലെ മൂന്ന് എംഎൽഎമാരും മന്ത്രിയായ ആദവ് അർജുനയുമായി അദ്ദേഹത്തിന്റെ ചേമ്പറിൽ രഹസ്യ കൂടിക്കാഴ്ച നടത്തി. ഇവർ മുഖ്യമന്ത്രി സി. ജോസഫ് വിജയ് നയിക്കുന്ന ഭരണകക്ഷിയായ തമിഴക വെട്രി കഴകത്തിൽ ചേർന്നു. മെയ് 13-ന് നിയമസഭയിൽ നടന്ന നിർണ്ണായക വിശ്വാസ വോട്ടെടുപ്പിൽ പാർട്ടിയുടെ കർശന വിപ്പ് ലംഘിച്ച് വിജയ് സർക്കാരിന് അനുകൂലമായി വോട്ട് ചെയ്ത 25 വിമത എംഎൽഎമാരിൽ ഉൾപ്പെടുന്നവരാണ് രാജി വെച്ച ഈ മൂന്ന് പേരും.അതേസമയം, വിമത പക്ഷത്തായിരുന്ന അഞ്ച് എംഎൽഎമാർ എടപ്പാടി പളനിസ്വാമിയുടെ നേതൃത്വം അംഗീകരിച്ച് ഔദ്യോഗിക പക്ഷത്തേക്ക് മടങ്ങിയെത്തിയത് എഐഎഡിഎംകെ.ക്കുള്ളിൽ വലിയ രാഷ്ട്രീയ ചലനങ്ങൾക്ക് കാരണമായിട്ടുണ്ട്. ആർക്കോട്ട് മണ്ഡലത്തിൽ നിന്നുള്ള എസ്എം സുകുമാർ ഉൾപ്പെടെയുള്ള പ്രമുഖ നേതാക്കളാണ് വേലുമണി ക്യാമ്പ് വിട്ട് എടപ്പാടിയുടെ പക്ഷത്തേക്ക് തിരിച്ചെത്തിയത്. ഈ അഞ്ച് പേരുടെ മടങ്ങിവരവോടെ തമിഴ്നാട് നിയമസഭയിൽ എടപ്പാടി പളനിസ്വാമിയെ അനുകൂലിക്കുന്ന ഔദ്യോഗിക എഐഎഡിഎംകെ എംഎൽഎമാരുടെ എണ്ണം 27 ആയി ഉയർന്നു.The post എഐഎഡിഎംകെ.ക്കുള്ളിൽ വീണ്ടും രാഷ്ട്രീയ അട്ടിമറി; മൂന്ന് എംഎൽഎമാർ രാജിവെച്ച് ടിവികെയിൽ ചേർന്നു appeared first on ഇവാർത്ത | Evartha.