തിരുവനന്തപുരത്തെ ഒരു തെരുവിൽനിന്ന് അമേരിക്കയിലെ ഏറ്റവും ശ്രദ്ധേയമായ നഗരങ്ങളിലൊന്നിന്റെ ഭരണത്തലപ്പത്തേക്ക്. ആറാം വയസ്സിൽ കുടുംബത്തോടൊപ്പം അമേരിക്കയിലേക്ക് കുടിയേറിയ നിത്യ രാമൻ ഇന്ന് ലോസ് ഏഞ്ചൽസിന്റെ മേയർ പദവിയിലെത്തിയിരിക്കുകയാണ്. നിലവിലെ മേയർ കാരെൻ ബാസിനെ പരാജയപ്പെടുത്തിയ നിത്യ, ഈ പദവിയിലെത്തുന്ന ആദ്യ ഏഷ്യൻ-അമേരിക്കൻ വനിതയെന്ന ചരിത്രനേട്ടവും സ്വന്തമാക്കി. അമേരിക്കയിലെ രണ്ടാമത്തെ വലിയ നഗരമായ ലോസ് ഏഞ്ചൽസിന്റെ മേയറാകുന്ന രണ്ടാമത്തെ വനിത കൂടിയാണ് അവർ.ഡിസിഷൻ ഡെസ്ക് എച്ച്ക്യു പുറത്തുവിട്ട കണക്കുകൾ പ്രകാരം 51.1 ശതമാനം വോട്ടാണ് നിത്യ നേടിയത്. കാരെൻ ബാസിന് 48.33 ശതമാനം വോട്ട് ലഭിച്ചു. ആറു വർഷത്തോളമായി ലോസ് ഏഞ്ചൽസ് സിറ്റി കൗൺസിലിലെ നാലാം ഡിസ്ട്രിക്ടിനെ പ്രതിനിധീകരിക്കുന്ന അംഗമാണ് നിത്യ. കൗൺസിലിലെത്തിയ ആദ്യ ഏഷ്യൻ-അമേരിക്കൻ വനിതയും ആദ്യ ദക്ഷിണേഷ്യൻ വംശജയും എന്ന നേട്ടവും അവർക്കുണ്ട്.ഭവനരഹിതരുടെ പ്രശ്നങ്ങളിൽനിന്ന് രാഷ്ട്രീയത്തിലേക്ക്കാലിഫോർണിയയിൽ അർബൻ പ്ലാനറായി പ്രവർത്തിച്ചിരുന്ന നിത്യ രാമൻ ഭവനരഹിതരുടെ പ്രതിസന്ധി പരിഹരിക്കാനുള്ള ശ്രമങ്ങളുടെ ഭാഗമായാണ് രാഷ്ട്രീയ രംഗത്തേക്ക് എത്തിയത്. നഗരത്തിലെ ഉയർന്ന ജീവിതച്ചെലവ്, ഭവനപ്രശ്നങ്ങൾ, അടിസ്ഥാന സൗകര്യങ്ങൾ എന്നിവയായിരുന്നു അവരുടെ രാഷ്ട്രീയ ഇടപെടലുകളിലെ പ്രധാന വിഷയങ്ങൾ. സാധാരണക്കാരുടെ ജീവിതപ്രശ്നങ്ങൾക്കും നഗരത്തിന്റെ അടിസ്ഥാന ആവശ്യങ്ങൾക്കും പ്രാധാന്യം നൽകിയ പ്രചാരണം യുവ വോട്ടർമാർക്കിടയിൽ നിത്യയ്ക്ക് പിന്തുണ നേടിക്കൊടുത്തു.2020ലാണ് ആദ്യമായി ലോസ് ഏഞ്ചൽസ് സിറ്റി കൗൺസിലിലേക്ക് തിരഞ്ഞെടുക്കപ്പെട്ടത്. 2024ൽ വീണ്ടും വിജയിച്ച് കൗൺസിലിൽ തുടർന്നു. നഗരത്തിന്റെ ഭാവി വികസനവും പൊതുസേവനങ്ങളുടെ മെച്ചപ്പെടുത്തലും ഉൾപ്പെടെയുള്ള വിഷയങ്ങളിൽ ശ്രദ്ധ കേന്ദ്രീകരിച്ചാണ് അവരുടെ പ്രവർത്തനം.2028ൽ ഒളിമ്പിക്‌സിന് ആതിഥേയത്വം വഹിക്കാനൊരുങ്ങുന്ന ലോസ് ഏഞ്ചൽസിന്റെ ഭരണനേതൃത്വത്തിലേക്കാണ് ഇപ്പോൾ നിത്യ എത്തുന്നത്. നഗരത്തിന്റെ അടിസ്ഥാന സൗകര്യങ്ങൾ, ഭവനപ്രതിസന്ധി, ജീവിതച്ചെലവ് തുടങ്ങിയ വിഷയങ്ങൾക്കൊപ്പം ആഗോള കായികമേളയുടെ ഒരുക്കങ്ങളും പുതിയ ഭരണനേതൃത്വത്തിന് മുന്നിലുള്ള പ്രധാന ഉത്തരവാദിത്തങ്ങളാകും.വേരുകൾ തിരുവനന്തപുരത്ത്; ജീവിതം അമേരിക്കയിൽ1981 ജൂലൈ 28നാണ് നിത്യ രാമൻ തിരുവനന്തപുരത്ത് ജനിച്ചത്. നഗരത്തിലെ കോട്ടയ്ക്കകത്തുള്ള രാമസ്വാമി കോവിൽ തെരുവിലായിരുന്നു പതിറ്റാണ്ടുകൾക്കു മുമ്പ് കുടുംബം താമസിച്ചിരുന്നത്. കെൽട്രോണിൽ ഉദ്യോഗസ്ഥനായിരുന്ന ആർ. വെങ്കട്ടരാമനും ഇന്ത്യൻ ഓവർസീസ് ബാങ്ക് ജീവനക്കാരിയായിരുന്ന സുധയുമാണ് മാതാപിതാക്കൾ. കുടുംബത്തിന്റെ പഴയ വീട് പിന്നീട് വിറ്റുപോയി. ഇപ്പോൾ കുടുംബാംഗങ്ങളാരും കോട്ടയ്ക്കകത്ത് താമസിക്കുന്നില്ല.നിത്യയ്ക്ക് ആറു വയസ്സുള്ളപ്പോഴാണ് കുടുംബം അമേരിക്കയിലെ ലൂസിയാനയിലേക്ക് കുടിയേറിയത്. തിരുവനന്തപുരത്ത് ജനിച്ച് അമേരിക്കയിൽ വളർന്ന അവർ പിന്നീട് ഉന്നത വിദ്യാഭ്യാസത്തിനും തൊഴിൽ ജീവിതത്തിനുമായി പുതിയ വഴികൾ തുറന്നു. ഹാർവാർഡ് സർവകലാശാലയിലും മസാച്യുസെറ്റ്സ് ഇൻസ്റ്റിറ്റ്യൂട്ട് ഓഫ് ടെക്നോളജിയിലും (എംഐടി) പഠനം പൂർത്തിയാക്കി.തമിഴ് വംശജനായ തിരക്കഥാകൃത്ത് വാലി ചന്ദ്രശേഖരനാണ് നിത്യയുടെ ഭർത്താവ്. ഇരട്ടക്കുട്ടികളായ കർണനും കാവേരിക്കുമൊപ്പം സിൽവർലേക്കിലാണ് കുടുംബം താമസിക്കുന്നത്.തിരുവനന്തപുരത്തെ വേരുകളും അമേരിക്കയിലെ വളർച്ചയും ചേർന്ന ജീവിതയാത്രയാണ് നിത്യ രാമനെ ലോസ് ഏഞ്ചൽസിന്റെ ഭരണത്തലപ്പത്തെത്തിച്ചത്. ഇന്ത്യൻ വംശജർക്ക് അമേരിക്കൻ രാഷ്ട്രീയത്തിൽ ലഭിക്കുന്ന പ്രാതിനിധ്യത്തിന്റെ പുതിയ അധ്യായം കൂടിയാണ് അവരുടെ വിജയം. ജനിച്ച നാടിന്റെ പേരും പേറി ലോകശ്രദ്ധയാകർഷിക്കുന്ന നഗരത്തിന്റെ മേയർ പദവിയിലെത്തിയ നിത്യയുടെ മുന്നിലുള്ളത് ഇനി വലിയ ഭരണപരീക്ഷണങ്ങളാണ്.The post തിരുവനന്തപുരത്തിന്റെ മകൾ ഇനി ലോസ് ഏഞ്ചൽസിന്റെ മേയർ; അമേരിക്കൻ നഗരഭരണത്തിൽ ചരിത്രം കുറിച്ച നിത്യ രാമൻ appeared first on ഇവാർത്ത | Evartha.