മനാമ: ബഹ്റൈനിലെ കടുത്ത വേനലിൽ നിർമ്മാണ മേഖലയിൽ ജോലി ചെയ്യുന്ന തൊഴിലാളികൾക്ക് ആശ്വാസവുമായി ബഹ്റൈൻ മലയാളി ബിസിനസ് ഫോറം (BMBF). സംഘടന വർഷങ്ങളായി നടത്തിവരുന്ന സൗജന്യ ദാഹജല-ഭക്ഷണ വിതരണ പദ്ധതിയായ ‘ഹെൽപ്പ് ആൻഡ് ഡ്രിങ്ക്’ സീസൺ 12-ന് തൂബ്ലിയിലെ രണ്ട് പ്രധാന വർക്ക് സൈറ്റുകളിൽ തുടക്കമായി.ബി.എം.ബി.എഫ് ജനറൽ സെക്രട്ടറി ബഷീർ അമ്പലായിയുടെ അധ്യക്ഷതയിൽ നടന്ന ചടങ്ങിൽ രക്ഷാധികാരി അനീഷ് കെ.വി പദ്ധതിയുടെ ഔദ്യോഗിക ഉദ്ഘാടനം നിർവഹിച്ചു. തൂബ്ലിയിലെ സിബാർക്കോ, അൽ റാഷിദ് ഗ്രൂപ്പ് എന്നീ പ്രമുഖ തൊഴിലിടങ്ങളിലായിരുന്നു ആദ്യഘട്ട വിതരണം നടന്നത്. സൈറ്റുകളിലെ തൊഴിലാളികൾക്ക് ദാഹജലം, പഴവർഗ്ഗങ്ങൾ, ലഘുഭക്ഷണങ്ങൾ, സാൻഡ്വിച്ച്, പാൻകേക്ക്, ഐസ്ക്രീം എന്നിവ വിതരണം ചെയ്തു. ഇതിനോടൊപ്പം തന്നെ വേനൽക്കാല ആരോഗ്യ സുരക്ഷ ഉറപ്പാക്കുന്നതിനുള്ള ബോധവൽക്കരണ പരിപാടികളും വിവിധ തൊഴിലിടങ്ങളിൽ ഇതോടൊപ്പം ആരംഭിച്ചിട്ടുണ്ട്.കഴിഞ്ഞ 12 വർഷമായി ബഹ്റൈൻ മലയാളി ബിസിനസ് ഫോറത്തിന്റെ നേതൃത്വത്തിൽ മാതൃകാപരമായി നടപ്പിലാക്കി വരുന്ന ഈ ജീവകാരുണ്യ പദ്ധതിക്ക് വലിയ ജനപ്രീതിയാണ് ലഭിക്കുന്നത്. ബഹ്റൈനിലെ വിവിധ മന്ത്രാലയങ്ങൾ, ക്യാപിറ്റൽ ഗവർണറേറ്റ്, പാർലമെന്റ് അംഗങ്ങൾ, ലേബർ മന്ത്രാലയം, സ്വദേശി-വിദേശി കമ്മ്യൂണിറ്റികൾ, വിവിധ സ്ഥാപനങ്ങൾ, ക്ലബുകൾ എന്നിവരെല്ലാം ഈ പദ്ധതിയെ ഏറെ ജനകീയമായ ഒരു കാരുണ്യപ്രവർത്തനമായി വിലയിരുത്തിയിട്ടുണ്ടെന്നും സമൂഹത്തിൽ വലിയൊരു സ്ഥാനം നേടിയെടുക്കാൻ സാധിച്ചതായും ഭാരവാഹികൾ അഭിമാനത്തോടെ അറിയിച്ചു. 2026-ലെ ഈ വർഷത്തെ ‘ഹെൽപ്പ് ആൻഡ് ഡ്രിങ്ക്’ കർമ്മപദ്ധതി വരുന്ന സെപ്റ്റംബറോടെ അവസാനിക്കും.തൂബ്ലിയിൽ നടന്ന വിതരണ പരിപാടികൾക്ക് കാസിം പാടത്തകായിൽ, മണിക്കുട്ടൻ, മൊയ്തീൻ പയ്യോളി, മൂസക്കുട്ടി ഹാജി, ഹുസൈൻ വയനാട്, ദിനേശ് പള്ളിയാലിൽ എന്നിവർ നേതൃത്വം നൽകി.The post തൊഴിലാളികൾക്ക് തണലായി ബി.എം.ബി.എഫ്; ‘ഹെൽപ്പ് ആൻഡ് ഡ്രിങ്ക്’ സീസൺ 12-ന് ഉജ്ജ്വല തുടക്കം appeared first on Bahrain Vartha ബഹ്റൈൻ വാർത്ത.