അമൽ നീരദ് സംവിധാനം ചെയ്യുന്ന പുതിയ ചിത്രം ‘ബാച്ചിലർ പാർട്ടി ഡ്യൂ’വിലൂടെ സിനിമയിൽ അരങ്ങേറ്റം കുറിക്കാനൊരുങ്ങുകയാണ് ഹൻസിക കൃഷ്ണ. ചിത്രത്തിൽ നസ്‌ലെന്റെ നായികയായാണ് താരം എത്തുന്നത്. കാരൾ എന്നാണ് കഥാപാത്രത്തിന്റെ പേര്. സിനിമയിലേക്ക് തിരഞ്ഞെടുക്കപ്പെട്ടതിന്റെ സന്തോഷവും നസ്‌ലെനൊപ്പം അഭിനയിച്ച അനുഭവങ്ങളും മാതൃഭൂമിക്ക് നൽകിയ അഭിമുഖത്തിൽ ഹൻസിക പങ്കുവെച്ചു.ചിത്രത്തിൽ നസ്‌ലെന്റെ നായികയായി ഹൻസിക എത്തുമെന്ന വാർത്തകൾ പുറത്തുവന്നപ്പോൾ അത് സത്യമാണോ എന്ന് പോലും വിശ്വസിക്കാനായില്ലെന്ന് താരം പറഞ്ഞു. വാർത്ത കേട്ട് ഏറെ സന്തോഷം തോന്നിയെന്നും ഹൻസിക വ്യക്തമാക്കി. നസ്‌ലെൻ വളരെ സൗഹൃദപരവും വിനയമുള്ളയാളുമാണെന്നും ചിത്രീകരണത്തിനിടെ പലപ്പോഴും സ്വാഭാവികമായി പറയുന്ന കാര്യങ്ങൾ മികച്ചതായി മാറാറുണ്ടെന്നും താരം കൂട്ടിച്ചേർത്തു.അഭിനയവുമായി ബന്ധപ്പെട്ട് അച്ഛൻ പ്രത്യേക ഉപദേശങ്ങൾ നൽകാറില്ലെന്നും മറ്റുള്ളവരോട് എങ്ങനെ പെരുമാറണമെന്ന കാര്യത്തിലാണ് കൂടുതൽ നിർദേശങ്ങൾ നൽകാറുള്ളതെന്നും ഹൻസിക പറഞ്ഞു. എല്ലാവരെയും ബഹുമാനിക്കണമെന്നും സൗഹൃദത്തോടെ ഇടപെടണമെന്നുമാണ് ചെറുപ്പം മുതൽ അച്ഛൻ പഠിപ്പിച്ചതെന്നും താരം വ്യക്തമാക്കി.2012ൽ പുറത്തിറങ്ങിയ ‘ബാച്ചിലർ പാർട്ടി’യുടെ സ്പിരിച്വൽ സീക്വലായാണ് ‘ബാച്ചിലർ പാർട്ടി ഡ്യൂ’ ഒരുങ്ങുന്നത്. എന്നാൽ ആദ്യ ചിത്രത്തിന്റെ നേരിട്ടുള്ള തുടർച്ചയല്ല ഇതെന്നും പുതിയ കഥയും തിരക്കഥയുമാണ് ചിത്രത്തിന്റേതെന്നും അണിയറപ്രവർത്തകർ വ്യക്തമാക്കിയിട്ടുണ്ട്. രജിഷ വിജയൻ, നസ്‌ലെൻ, കുഞ്ചാക്കോ ബോബൻ, ടൊവിനോ തോമസ്, സൗബിൻ ഷാഹിർ, ഷറഫുദ്ദീൻ, ശ്രീനാഥ് ഭാസി, ഷൈൻ ടോം ചാക്കോ, ജ്യോതിർമയി, നാദിയ മൊയ്തു തുടങ്ങിയവരും ചിത്രത്തിലുണ്ട്. നവംബർ 19ന് ചിത്രം തിയേറ്ററുകളിലെത്തും.The post നസ്‌ലെന്റെ നായികയായി ഹൻസിക കൃഷ്ണ; അരങ്ങേറ്റ ചിത്രത്തിന്റെ ആവേശം പങ്കുവെച്ച് താരം appeared first on ഇവാർത്ത | Evartha.