റിയാദ് : ആരോഗ്യസ്ഥിതിയുടെ മെഡിക്കൽ വിലയിരുത്തലിനെ അടിസ്ഥാനമാക്കിയുള്ള അംഗീകൃത ചട്ടങ്ങളും നടപടിക്രമങ്ങളും അനുസരിച്ചാണ് അസുഖ അവധി അനുവദിക്കുന്നതെന്ന് സൗദി ആരോഗ്യ മന്ത്രാലയം ഓർമ്മിപ്പിച്ചു.ഗുണഭോക്താവിന്റെ അഭ്യർത്ഥനയുടെയോ ആഗ്രഹത്തിന്റെയോ അടിസ്ഥാനത്തിലല്ലെന്നും, മറിച്ച് അവധിയുടെ യഥാർത്ഥ ആവശ്യകതയെക്കുറിച്ചും ആരോഗ്യസ്ഥിതി ജോലി ചെയ്യാനോ ദൈനംദിന പ്രവർത്തനങ്ങൾ നടത്താനോ ഉള്ള കഴിവിനെ എത്രത്തോളം ബാധിക്കുന്നുവെന്നും ഡോക്ടർ നിർണ്ണയിക്കുന്നതിനെ അടിസ്ഥാനമാക്കിയാണെന്നും ആരോഗ്യ മന്ത്രാലയം വ്യക്തമാക്കി.മെഡിക്കൽ അവധി അനുവദിക്കുന്നതുമായി ബന്ധപ്പെട്ട നിയമലംഘനങ്ങളിൽ മെഡിക്കൽപരമായ മതിയായ കാരണങ്ങളില്ലാതെ അവധി അനുവദിക്കൽ, അവധി അനുവദിക്കുന്നതിന് ന്യായീകരണം സൃഷ്ടിക്കുന്നതിനായി മെഡിക്കൽ രേഖകളിൽ കൃത്രിമം കാണിക്കൽ, അധികാരമില്ലാത്ത വ്യക്തികളോ സ്ഥാപനങ്ങളോ മെഡിക്കൽ അവധി നൽകൽ എന്നിവ ഉൾപ്പെടുന്നതായി മന്ത്രാലയം വ്യക്തമാക്കി.അനർഹമായ ആനുകൂല്യം ലഭിക്കുന്നതിന് ഗുണഭോക്താക്കളെ സഹായിക്കൽ, മെഡിക്കൽ അവധിയിലും അതുമായി ബന്ധപ്പെട്ട വിവരങ്ങളിലും വ്യാജരേഖകൾ ചമയ്ക്കൽ തുടങ്ങിയവയും നിയമലംഘനങ്ങളാണ്. ഇത്തരം നടപടികളിൽ ഏർപ്പെടുന്നവർക്കെതിരെ ബന്ധപ്പെട്ട നിയമങ്ങളും ചട്ടങ്ങളും അനുസരിച്ച് നടപടി സ്വീകരിക്കുമെന്നും മന്ത്രാലയം മുന്നറിയിപ്പ് നൽകി.രോഗിയുടെ ആരോഗ്യസ്ഥിതിയും മെഡിക്കൽ പരിശോധനയിലെ രോഗനിർണയവും അടിസ്ഥാനമാക്കിയാണ് മെഡിക്കൽ അവധിയുടെ കാലാവധി നിശ്ചയിക്കുന്നതെന്ന് അധികൃതർ വ്യക്തമാക്കി. ഡോക്ടർമാർക്കും ആരോഗ്യസ്ഥാപനങ്ങൾക്കും അനുവദിച്ചിട്ടുള്ള അധികാരപരിധി അനുസരിച്ചായിരിക്കും അവധി അനുവദിക്കുക.ചികിത്സിക്കുന്ന ഡോക്ടറുടെ അധികാരപരിധി കവിയുന്ന കാലയളവിലേക്കുള്ള മെഡിക്കൽ അവധികൾക്ക് കൂടുതൽ അംഗീകാര നടപടികൾ ആവശ്യമാണ്. അംഗീകൃത കാലയളവും ചട്ടങ്ങളും അനുസരിച്ച് മറ്റ് ഡോക്ടർമാരുടെയോ ബന്ധപ്പെട്ട മെഡിക്കൽ കമ്മിറ്റികളുടെയോ മെഡിക്കൽ ബോർഡുകളുടെയോ അനുമതി ഇതിന് ലഭിക്കണമെന്നും അധികൃതർ വിശദീകരിച്ചു.അംഗീകൃത ആരോഗ്യസ്ഥാപനങ്ങളിൽ നിന്ന്, നിശ്ചിത നടപടിക്രമങ്ങൾ പ്രകാരം മെഡിക്കൽ പരിശോധന നടത്തി മാത്രമേ രോഗാവധി (മെഡിക്കൽ ലീവ്) നേടാവൂ എന്ന് മന്ത്രാലയം വ്യക്തമാക്കി.ഇലക്ട്രോണിക് രീതിയിൽ അനുവദിക്കുന്ന മെഡിക്കൽ അവധികൾ ഗുണഭോക്താക്കൾക്ക് ‘സിഹത്തി’ (صحتي) ആപ്പ് വഴി ലഭ്യമാകുമെന്നും മന്ത്രാലയം അറിയിച്ചു.The post ഗുണഭോക്താവ് അഭ്യർത്ഥിക്കുമ്പോഴേക്ക് അസുഖ അവധി അനുവദിക്കില്ലെന്ന് സൗദി ആരോഗ്യ മന്ത്രാലയം appeared first on Arabian Malayali.