ہرمن پریت کور نے ہندوستانی خواتین کرکٹ ٹیم کی کپتانی سے استعفیٰ دے دیا ہے۔ انہوں نے کپتانی چھوڑنے کے فیصلہ کی اطلاع سوشل میڈیا پلیٹ فارم ’انسٹاگرام‘ کے اپنے آفیشیل ہینڈل کے ذریعہ دی۔ انہوں نے اپنی ’انسٹاگرام‘ پوسٹ میں لکھا کہ وہ ہندوستانی خواتین کرکٹ ٹیم کے تینوں فارمیٹ کی کپتانی چھوڑ رہی ہیں۔ واضح رہے کہ ہرمن پریت کور نے تینوں فارمیٹ کی کپتانی چھوڑنے کا فیصلہ بی سی سی آئی کے ساتھ ہوئی جائزہ میٹنگ کے بعد لیا۔ گواہاٹی میں ہندوستانی خواتین کرکٹ ٹیم کی جائزہ میٹنگ ہوئی تھی، جس کی صدارت بی سی سی آئی کے سکریٹری دیوجیت سیکیا نے کی تھی۔ اس میٹنگ میں ہندوستانی خواتین ٹیم کی طرف سے ہرمن پریت کور، اسمرتی مندھانا اور کوچ امول مجُمدار بھی موجود تھے۔ View this post on Instagram ہرمن پریت کور نے انسٹاگرام پر لکھا کہ ’’آج میں تمام فارمیٹس میں ہندوستانی خواتین کرکٹ ٹیم کی کپتانی سے دستبردار ہو رہی ہوں۔ یہ آسان فیصلہ نہیں ہے۔ اس کے ساتھ برسوں کی یادیں، جذبات، قربانیاں اور ایسے لمحات جڑے ہیں جو زندگی بھر میرے ساتھ رہیں گے۔ میں نے اس ٹیم اور ہندوستانی خواتین کرکٹ کے لیے اپنا سب کچھ دیا ہے اپنا خون، پسینہ، وقت اور کئی بار اپنے کھیل اور ذاتی عزائم کا ایک حصہ بھی۔ ایسے مواقع بھی آئے جب مجھے اپنی انفرادی کارکردگی، اپنی ترقی اور اپنی خواہشات کو ایک طرف رکھنا پڑا، کیونکہ میرا ماننا تھا کہ ٹیم کو ہمیشہ سب سے پہلے رکھنا چاہیے۔‘‘خاتون کرکٹر نے مزید لکھا کہ ’’کپتان کی حیثیت سے مجھے مشکل فیصلے کرنے پڑے۔ ایسے فیصلے جو ہمیشہ سمجھے نہیں گئے، ہمیشہ آسان نہیں تھے اور کبھی کبھی ان کی ذاتی قیمت بھی چکانی پڑی۔ لیکن میرے ہر فیصلے کا مقصد ایک ہی تھا، اس ٹیم کو بہتر بنانا اور دیگر کھلاڑیوں کو آگے بڑھنے، خود پر یقین کرنے اور اپنی بہترین صلاحیتوں کے مطابق کھیلنے کا موقع دینا۔‘‘ ساتھ ہی انہوں نے لکھا کہ ’’ میں نے سب کچھ دیکھا ہے۔ میں نے مشکل ترین لمحات، دل توڑ دینے والی شکستیں، تنقید، شکوک اور وہ دن دیکھے ہیں جب ایسا لگتا تھا کہ کچھ بھی ہمارے حق میں نہیں ہو رہا۔ اور میں نے بلند ترین کامیابیاں بھی دیکھی ہیں فتوحات، جشن، اپنے ملک کی نمائندگی کرنے کا فخر اور وہ لمحات جنہوں نے ہر قربانی کو قابل قدر بنا دیا۔‘‘ہرمن پریت کور نے جذباتی ہوتے ہوئے لکھا کہ ’’میں آج جذبات سے بھرے دل کے ساتھ کپتانی چھوڑ رہی ہوں، لیکن ساتھ ہی میرے دل میں سکون بھی ہے۔ کیونکہ مجھے واقعی یقین ہے کہ میری ٹیم ایک اچھی جگہ پر ہے۔ یہ ایک ایسی ٹیم ہے جس میں صلاحیت، کردار، یقین اور ایک روشن مستقبل ہے، جسے دیکھنے اور اس کا حصہ بننے کے لیے میں بے حد پرجوش ہوں۔ مجھے لگتا ہے کہ میں نے اپنی ذمہ داری پوری کر دی ہے۔ میں نے اس ٹیم کو اپنا سب کچھ دیا۔ میں نے اس ذمہ داری کو فخر کے ساتھ نبھایا اور ہندوستانی خواتین کرکٹ کی قیادت کرنے کا موقع ملنے پر ہمیشہ شکر گزار رہوں گی۔‘‘ ساتھ ہی انہوں نے لکھا کہ ’’اب میرے لیے نیا صفحہ پلٹنے کا وقت ہے۔ کپتانی آج ختم ہو سکتی ہے، لیکن ہندوستانی کرکٹ سے میری محبت کبھی ختم نہیں ہوگی۔ ہر ساتھی کھلاڑی، کوچ، معاون عملے، انتظامیہ، بی سی سی آئی، خاندان کے افراد اور ہر اس مداح کا شکریہ جو اچھے اور مشکل وقت میں میرے ساتھ کھڑا رہا۔ خون، پسینہ، قربانی، فخر میں نے اپنا سب کچھ دے دیا۔ اب میں ایک بار پھر کھیل کی محبت کے لیے کھیلنے کے لیے تیار ہوں۔ کپتانی ختم، سفر جاری ہے۔‘‘