روس نے نیٹو کو ممکنہ جوہری ردعمل سے خبردار کر دیا۔رکن ممالک کو بھیجے گئے ایک سفارتی دستاویز کے مطابق روس نے نیٹو کو خبردار کیا ہے کہ اگر مغربی اتحاد نے بالٹک خطے میں واقع روسی علاقے ‘کیلینن گراڈ’ کا رابطہ منقطع کرنے کی کوشش کی تو وہ اپنے تمام تر عسکری وسائل، بشمول جوہری ہتھیار، استعمال کرنے کے لیے تیار ہے۔بدھ کے روز بھیجے گئے اس سفارتی مراسلے میں دعویٰ کیا گیا کہ ماسکو کے پاس "یہ معلومات موجود ہیں کہ نیٹو کیلینن گراڈ کا فضائی اور بحری محاصرہ کرنے کی تیاری کر رہا ہے”۔نیٹو کی جانب سے ردعمل سیکرٹری جنرل مارک روٹے نے دیا۔انہوں نے کہا کہ نیٹو ایک دفاعی اتحاد ہے اور روس کو "جوہری دھمکیاں دینا بند” کر دینا چاہیے، ساتھ ہی انہوں نے اس دستاویز کو غیر مفید قرار دیا۔مارک روٹے نے اس دھمکی کی سنگینی کو بھی کم اہمیت کا حامل قرار دیتے ہوئے کہا کہ "پیوٹن جانتے ہیں کہ نیٹو کے ساتھ براہِ راست تصادم میں وہ کبھی جیت نہیں سکتے”۔