کولکاتا: کلکتہ ہائی کورٹ نے مغربی بنگال کی نندی گرام اسمبلی سیٹ پر ہونے والے ضمنی انتخاب سے قبل کانگریس امیدوار ملن پردھان کو بڑی قانونی راحت دیتے ہوئے عبوری ضمانت دے دی ہے۔ جسٹس تیرتھنکر گھوش کی سنگل جج بنچ نے منگل کو انہیں 6 مجرمانہ مقدمات میں 20 اکتوبر تک عبوری ضمانت دی، تاکہ وہ دیگر امیدواروں کی طرح انتخابی مہم میں حصہ لے سکیں۔عدالت نے واضح کیا کہ عبوری ضمانت کا مقصد ملن پردھان کو آزادانہ طور پر انتخاب لڑنے اور انتخابی مہم چلانے کا موقع دینا ہے۔ عدالت نے ان پر متعدد شرائط بھی عائد کی ہیں۔ انہیں انتخابی عمل مکمل ہونے کے بعد ہلدیہ کی متعلقہ عدالت میں خودسپردگی کرنا ہوگی۔ بعض رپورٹس کے مطابق خودسپردگی کی تاریخ 21 اکتوبر مقرر کی گئی ہے۔ملن پردھان کو 18 ستمبر کو گرفتار کیا گیا تھا۔ ان کے خلاف درج مقدمات کا تعلق 2007 میں نندی گرام میں زمین حصول کے خلاف ہونے والی تحریک سے بتایا جاتا ہے۔ ان پر قتل، اقدام قتل اور دیگر دفعات کے تحت مقدمات درج ہیں۔ وہ گرفتاری کے بعد عدالتی حراست میں تھے اور ان کی عدالتی حراست 7 اکتوبر تک بڑھائی گئی تھی۔ملن پردھان کی گرفتاری ایسے وقت ہوئی تھی جب وہ نندی گرام ضمنی انتخاب کے لیے اپنا نامزدگی پرچہ داخل کر چکے تھے۔ اس سے قبل کلکتہ ہائی کورٹ کی مختلف بنچوں میں ان کی گرفتاری اور انتخاب لڑنے کے حق سے متعلق معاملہ زیر سماعت رہا۔ 25 ستمبر کو ڈویژن بنچ نے ایک سابقہ عدالتی تحفظ کو ختم کرتے ہوئے انہیں باقاعدہ ضمانت کے قانونی راستے سے رجوع کرنے کی ہدایت دی تھی۔نندی گرام ضمنی انتخاب کی سیاسی اہمیت اس لیے بھی ہے کہ یہ سیٹ موجودہ وزیر اعلیٰ شوبھندو ادھیکاری نے خالی کی ہے۔ انہوں نے اسمبلی انتخابات میں نندی گرام اور بھوانی پور دونوں نشستوں سے کامیابی حاصل کی تھی، لیکن بعد میں بھوانی پور سیٹ برقرار رکھنے کا فیصلہ کیا، جس کے نتیجے میں نندی گرام میں ضمنی انتخاب ضروری ہوا۔نندی گرام اور مرشدآباد ضلع کی ریجی نگر اسمبلی سیٹ پر ضمنی انتخاب 6 اکتوبر کو ہوگا، جبکہ ووٹوں کی گنتی 9 اکتوبر کو مقرر ہے۔ ملن پردھان کو عبوری ضمانت ملنے کے بعد وہ اب انتخابی مہم میں براہ راست حصہ لے سکیں گے۔