واشنگٹن(29 اکتوبر 2026): امریکی وزیر دفاع نے پینٹاگون کے ایک اور سینئر اور اہم ترین فوجی عہدیدار کو ان کے عہدے سے ہٹا دیا ہے۔امریکی محکمہ دفاع (پینٹاگون) میں اعلیٰ ترین عسکری اور انتظامی سطح پر تبدیلیوں کا سلسلہ جاری ہے اور تازہ ترین پیشرفت کے تحت امریکی وزیر دفاع نے پینٹاگون کے ایک اور سینئر اور اہم ترین فوجی عہدیدار کو ان کے عہدے سے ہٹا دیا ہے۔ رواں سال کے دوران اعلیٰ عسکری قیادت کو ہٹائے جانے کا یہ پانچواں بڑا واقعہ ہے۔دفاعی حکام کے مطابق امریکی وزیر دفاع نے جوائنٹ چیفس آف اسٹاف میں حکمت عملی، منصوبہ بندی اور پالیسی کے سربراہ لیفٹیننٹ جنرل بریٹ سلویا کو ان کے منصب سے برطرف کر دیا ہے۔امریکی میڈیا رپورٹس کے مطابق لیفٹیننٹ جنرل بریٹ سلویا کی برطرفی کی بنیادی وجہ پینٹاگون کے اعلیٰ ترین سویلین پالیسی عہدیدار ایلبرج کولبی کے ساتھ ان کے پالیسی معاملات اور امورِ کار پر بار بار ہونے والے شدید تنازعات اور اختلافات تھے۔دفاعی ماہرین کا کہنا ہے کہ یہ قدم پینٹاگون میں سویلین اور عسکری قیادت کے درمیان پالیسی سازی کے تناظر میں بڑھتی ہوئی کشیدگی اور انتظامیہ کے اہداف سے ہم آہنگی کی کوششوں کا نتیجہ ہے۔پینٹاگون کے ذرائع کے مطابق امریکی وزیر دفاع کی جانب سے اعلیٰ عسکری کمانڈ میں تبدیلیوں کا یہ سلسلہ رواں سال کے دوران جاری ہے۔ لیفٹیننٹ جنرل بریٹ سلویا کی برطرفی کے ساتھ ہی رواں سال کے دوران اب تک پانچ سینئر جنرلز کو ان کے عہدوں سے ہٹایا جا چکا ہے، جس نے امریکی دفاعی حلقوں میں اہم بحث چھیڑ دی ہے۔