ഉത്തർപ്രദേശിലെ വോട്ടർപട്ടികയിൽ 1.27 കോടി ഹിന്ദുക്കളുടെ പേരുകൾ ഉൾപ്പെട്ടിട്ടില്ലെന്ന് മുഖ്യമന്ത്രി യോഗി ആദിത്യനാഥിന്റെ ആരോപണം. ലഖ്‌നൗവിൽ നടന്ന ബിജെപി സംസ്ഥാന നിർവാഹക സമിതി യോഗത്തിലാണ് അദ്ദേഹം ഇക്കാര്യം ഉന്നയിച്ചത്. അർഹരായ വോട്ടർമാരുടെ പേരുകൾ പട്ടികയിൽ ഉൾപ്പെടുത്താൻ പാർട്ടി പ്രവർത്തകർ അടിയന്തരമായി ഇടപെടണമെന്നും യോഗി നിർദേശിച്ചു.വോട്ടർപട്ടികയിലെ അപാകതകൾ നഗര തദ്ദേശ സ്വയംഭരണ സ്ഥാപനങ്ങളിലെ 28 മണ്ഡലങ്ങളിൽ ബിജെപിയുടെ തിരഞ്ഞെടുപ്പ് സാധ്യതകളെ ബാധിക്കുന്നുണ്ടെന്നും അദ്ദേഹം പറഞ്ഞു. സംസ്ഥാനത്ത് 16 കോടിയിലധികം വോട്ടർമാർ ഉണ്ടാകേണ്ടതാണെന്നും എന്നാൽ നിലവിലെ പട്ടികയിൽ ഏകദേശം 13 കോടി പേർ മാത്രമാണുള്ളതെന്നും യോഗി ചൂണ്ടിക്കാട്ടി.പഞ്ചായത്ത് തിരഞ്ഞെടുപ്പിനുള്ള വോട്ടർപട്ടികയിൽ ഉൾപ്പെട്ട 66 ലക്ഷം പേരുടെ വിവരങ്ങൾ നിയമസഭാ മണ്ഡലങ്ങളിലെ പട്ടികയിൽ ഇല്ലെന്നും അദ്ദേഹം ആരോപിച്ചു. സർക്കാർ ക്ഷേമപദ്ധതികളുടെ 55 ലക്ഷം ഗുണഭോക്താക്കളും 18–19 പ്രായപരിധിയിലുള്ള ഏകദേശം 4.5 ലക്ഷം യുവാക്കളും വോട്ടർപട്ടികയിൽ ഉൾപ്പെട്ടിട്ടില്ലെന്നും യോഗി അവകാശപ്പെട്ടു.വോട്ടർപട്ടികയിലെ വീഴ്ചകൾ പരിഹരിക്കാൻ ബൂത്ത് ലെവൽ ഓഫീസർമാരുമായി സഹകരിച്ച് പ്രവർത്തിക്കണമെന്ന് ബിജെപി പ്രവർത്തകർക്ക് അദ്ദേഹം നിർദേശം നൽകി. എംപിമാർ, എംഎൽഎമാർ, പാർട്ടി ഭാരവാഹികൾ എന്നിവർ പ്രവർത്തനങ്ങൾക്ക് നേതൃത്വം നൽകി അർഹരായ എല്ലാവരുടെയും പേര് പട്ടികയിൽ ഉറപ്പാക്കണമെന്നും യോഗി ആവശ്യപ്പെട്ടു.The post യുപിയിൽ 1.27 കോടി ഹിന്ദുക്കളുടെ പേരുകൾ വോട്ടർപട്ടികയിൽ ഇല്ലെന്ന് യോഗി ആദിത്യനാഥ് appeared first on ഇവാർത്ത | Evartha.