சென்னை புளியந்தோப்பைச் சோ்ந்த ரௌடி ரூபன் (37), கொலைக்குப் பழிவாங்கப்போவதாக சமூக வலைதளத்தில் ‘ரீல்ஸ்’ வெளியிட்ட நபரை போலீஸாா் கைது செய்தனா். புழல் காவல் நிலையக் குற்றவாளியான காவாங்கரை ரமேஷ் என்ற நாய் ரமேஷை, அதே பகுதியைச் சோ்ந்த ரௌடிகளான காா்டன் சரத், அபினேஷ் ஆகியோா் கடந்த 2020-இல் கொலை செய்ததாகக் கூறப்படுகிறது. இந்த வழக்கில் தண்டனை பெற்று வெளியே வந்துள்ள இருவரையும் கொலை செய்து பழிவாங்கப்போவதாகவும், விரைவில் அவா்களின் தலைகள் சிதைக்கப்படும் என்றும் ரமேஷின் சகோதரரான சென்னை புளியந்தோப்பைச் சோ்ந்த ரூபன் சமூக வலைதளத்தில் ‘ரீல்ஸ்’ வெளியிட்டுள்ளாா். தொலைக்காட்சிகளில் ஒளிபரப்பப்படும் கொலைச் செய்திகளைப் போன்ற பாணியில் அவா் இந்த ரீல்ஸை வெளியிட்டதாகக் கூறப்படுகிறது. இது குறித்த தகவலின்பேரில், மேற்கு அதிதீவிர குற்றத் தடுப்புப் பிரிவு போலீஸாா் ரூபனைக் கைது செய்தனா். ரூபன் மீது 3 கொலை வழக்குகள், 2 கொலை முயற்சி வழக்குகள், 2 ஏடிஎம் கொள்ளை முயற்சி வழக்குகள் உள்பட 21 வழக்குகள் நிலுவையில் உள்ளது குறிப்பிடத்தக்கது.