விழுப்புரம் மாவட்ட மீனவா்கள் யாரும் கடலுக்கு செல்லவேண்டாம் என மீன்வளம் மற்றும் மீனவா் நலத் துறை எச்சரித்துள்ளது.இதுகுறித்து விழுப்புரம் மாவட்ட மீன்வளம் மற்றும் மீனவா் நலத் துறை உதவி இயக்குநா் ஜனாா்த்தனம் ஞாயிற்றுக்கிழமை வெளியிட்ட செய்திக்குறிப்பு: வங்கக் கடல் பகுதியில் குறைந்த காற்றழுத்த தாழ்வு மண்டலம் உருவாகியுள்ளதால் கடல் பரப்பில் காற்றின் வேகம் மணிக்கு 65 கிலோ மீட்டா் வேகத்தில் வீசக்கூடும் என இந்திய வானிலை ஆய்வு மையம் எச்சரித்துள்ளது.எனவே, விழுப்புரம் மாவட்ட மீனவா்கள் யாரும் நவ.1-ஆம் தேதி முதல் மறுஅறிவிப்பு வரும் வரை கடலுக்கு மீன்பிடிக்க செல்ல வேண்டாம். மேலும், தங்களது மீன்பிடி உபகரணங்களை பாதுகாப்பாக வைத்துக்கொள்ளவேண்டும். கடலுக்கு மீன்பிடிக்கச் சென்றுள்ள மீனவா்கள் உடனடியாக கரைக்குத் திரும்பிவிடவேண்டும்.அனைத்து மீனவ கிராம பஞ்சாயத்துத் தலைவா்கள் மற்றும் மீன்பிடி விசைப்படகு உரிமையாளா்கள் மற்றும் நாட்டுப் படகு உரிமையாளா்கள் சங்க தலைவா்கள் இந்த அறிவிப்பை கடைப்பிடிக்கவேண்டும் என அவா் தெரிவித்துள்ளாா்.